Tags-Hijr

kah do ye kohkan se ki marnā nahīñ kamāl
mar mar ke hijr-e-yār meñ jiinā kamāl hai

vasl thī merī sazā hijr intiqām-e-ġhair thā
kab huā ḳhū-karda-e-hijrāñ giraftār-e-firāq

hijr meñ ro.e to jī halkā huā
dard ke andar davā maujūd hai

qissa-e-hijr kī kahānī meñ
baat hai sirf chāñd tāroñ kī

vo shām-e-vasl hai ai ham-nashīñ sahar jis kī
vo sub.h-e-hijr hai ai dil ki jis kī shaam nahīñ

hijr ke lamhe shumāreñ yā lakīreñ harf ham
har hisāb us ke liye hai har kitāb us ke liye

jo duudh kā jalā ho piye chhāchh phūñk phūñk
huuñ vasl meñ pe hijr se hai mujh ko Dar hanūz

hijr meñ piitā huuñ ḳhūn-e-dil mai-e-gulgūñ kī rañg
daur-e-sāġhar jāntā huuñ gardish-e-aflāk ko

tārīf ġham-e-hijr kī kyā mujh se bayāñ ho
ik zahr hai jo qalb o jigar kaaT rahā hai

aur zarḳhez karegā ye mire lafzoñ ko
hijr yaktā hai to yaktā hī kamā.ī degā

ye hijr kī dozaḳh hī bhalī jaisī hai sab hai
is vasl kī jannat se ki sab hai bhī nahīñ bhī

uThte hī dil meñ Tiis jigar meñ Tapak huī
kartī hai dard-e-hijr se goyā nibāh choT

hijr kī raah meñ chalte rahe girte-paḌte
saath kuchh bhī na liyā be-sar-o-sāmānī meñ

dil hijr ke dard se bojhal hai ab aan milo to behtar ho
is baat se ham ko kyā matlab ye kaise ho ye kyūñkar ho

ġham-e-firāq kī manzil 'ra.īs' ḳhatm huī
ab aage jalve hī jalve haiñ hijr-e-yār ke ba.ad

hijr kī raat thī itnī lambī kaaTe se naañ kaTtī thī
ġham kī jot jagā.ī maiñ ne is dil ke bahlāne ko

ḳhayāl-e-hijr meñ ab jo bhī sāneha hogā
vahī to phir se nayā ek silsila hogā

jo tire hijr meñ milā 'momin'
bas vahī ġham ḳhushī sā lagtā hai

hijr kī sauġhāt kyā laa.ī bahut
be-tahāsha yaad bhī aa.ī bahut

hijr kā mere dil meñ añdherā kiye vo jo pardes meñ thā baserā kiye
jis ke aane kā koī gumāñ bhī na thā daf.atan mujh ko aa ke vo chauñkā gayā