Tags-Abad

rahegā to na terā zulm par roz-e-abad tak
hamāre dard kī jāgīr rahne ke liye hai

abad tak kaukab-e-baḳht-e-sa.ādat ban ke chamkeñge
hue haiñ jazb jo qatre lahū ke teġh-e-qātil meñ

jo apne qaul ko qānūn samjheñ
vo qaa.el ho nahīñ sakte abad tak

ye jabr-e-māh-o-sāl meñ ghirī huī zamīñ mirī gavāh hai
nashāt kī abad-kanār manziloñ meñ ek umr se maiñ un karīm aur jamīl sā.atoñ kā muntazir huuñ

azal ho yā abad donoñ asīr-e-zulf-e-hazrat haiñ
jidhar nazreñ uThāoge yahī ik silsilā hogā

sub.h-e-azal se shām-e-abad tak mere hī dam se raunaq hai
is manzar se us manzar tak us manzar se aage bhī

maiñ azal kā rāh-rau mujh ko abad kī justujū
gard-e-rah mere jilau meñ saath mere maiñ na tū

us dukh ne rakkhā hai mujh ko abad talak
jis dukh ne haañ mujh ko jām-e-azal diye

urūj-e-māh hai aur maqbaroñ par
abad kī chāñdnī chaTkī huī hai

zamāna tā-ba-abad un ko bhar nahīñ saktā
jigar pe khaa.e haiñ vo zaḳhm-e-dostī maiñ ne

sub.h-e-azal se shām-e-abad tak hai ek din
ye din taḌap taḌap ke basar kar rahe haiñ ham

haiñ fikr ke āsār ḳhudāoñ kī jabīñ par
ik abd-e-ziyāñ-kār ko ilhād kī zid hai

kyoñ lafz mere lab pe Thaharte haiñ abad tak
kyā naql-e-makānī mire lahje meñ nahīñ hai

fareb-e-va.ada pe ham tā-abad ji.eñ lekin
hazār haif ye imkān umr bhar bhī nahīñ

DhūñDhtī kyuuñ na rahe us ko abad tak duniyā
jis ne chhupne kī azal hī meñ qasam khaa.ī hai

ā.īne ke āḳhirī iz.hār meñ
maiñ bhī huuñ shām-e-abad-āsār meñ

lā-intihā jahān-e-mujassam se bhī sivā
lā-muntahā zamānoñ meñ rahte hue ye abad

ġham abad kā nahīñ hai aan kā hai
aur is kā koī hisāb nahīñ

ik tirī yaad ki mānind-e-sahar raushan hai
ik tirā naam ki mujh ko abad-āsār huā

sub.h-e-azal kā ruup ki shām-e-abad kā giit
saaya ho dhuup ho ki gumāñ kuchh na kuchh to ho