Tags-Ishq

ishq ke us moḌ ko sab log kahte haiñ junūñ
dil kisī ko yaad jab shām-o-sahar karne lage

tark-e-ishq us sarv-e-bālā kā kiyā hai jab se dil
ālam-e-bālā se bālā.ī ḳhabar laatā nahīñ

muḳhtasar apnī hadīs-e-zīst ye hai ishq meñ
pahle thoḌā sā hañse phir umr bhar royā kiye

nahīñ bachā maraz-e-ishq se koī 'mamnūñ'
hameñ dareġh bahut hai tirī javānī kā

aaj shab-e-visāl hai dekheñge aap hijr bhī
aag jalā ke ishq kī is meñ davām Daal duuñ

mujh ko jin se ishq hai un ko hai mujh se dushmanī
yaañ vo aate the ki uljhe paañv gesū-e-dost

jigar ko ishq ne faulād kar diyā hai jab
nahīñ rahā hai sitam-kār ko sitam kā jigar

aisā daarū ho rah-e-ishq se baaz aa.eñ qadam
aisā chāra ho ki bas hosh Thikāne lag jaa.eñ

māyūs ho chale haiñ malāmat-garān-e-ishq
vo vaqt hai ki baat samajhtā nahīñ huuñ maiñ

vo jāneñ ishq-o-havas ko jab tak hayāt dushman kī hai ġhanīmat
baḌhegī us se hī qadr apnī ki ġhārat us ko ḳhudā na karnā

mujhe saaqī ne be-minnat ke dī mai
ḳhumār-e-ishq-e-mardāna banāyā

pukārā ishq ne jā DhūñDh le yaar
tan-e-ḳhākī ko hai ḳhāna banāyā

shart mat rakh ki rah-e-ishq-e-butāñ meñ 'ādil'
vaqt kī rū se baġhāvat nahīñ kī jā saktī

aag the ibtidā-e-ishq meñ ham
ab jo haiñ ḳhaak intihā hai ye

jān-e-fikr-o-fan ab bhī ishq kī kahānī hai
lafz haiñ na.e lekin dāstāñ purānī hai

pīchhe pīchhe paañv uThte jā rahe haiñ ishq meñ
aage aage vo batātī jā rahī hai rāsta

zulmat-e-shab meñ jalā.e hue ashkoñ ke charāġh
ishq kī raah meñ ḳhud ishq hai rahbar apnā

husn huuñ maiñ ki ishq kī tasvīr
be-ḳhudī tujh se pūchhtā huuñ maiñ

kuchh iztirāb-e-ishq kā aalam na pūchhiye
bijlī taḌap rahī thī ki jaan is badan meñ thī

us sā māshūq jahāñ meñ koī mujh sā āshiq
'arsh' aage na huā thā na huā mere ba.ad