Tags-Jabr

har saañs se dars-e-aman diyā har jabr pe dād-e-ulfat dī
qātil ko bhī gar lab hil na sake āñkhoñ se duā-e-rahmat dī

fasāna jabr kā yāroñ kī tarah kyuuñ 'majrūh'
maza to jab hai ki jo kahiye barmalā kahiye

ye jabr-e-siyāsat ye insāñ mazlūm aaheñ majbūr fuġhāñ
zaḳhmoñ kī mahak dāġhoñ kā dhuāñ mat pūchh fazā-e-zindāñ meñ

maqdūr apnā kuchh bhī nahīñ is dayār meñ
shāyad vo jabr hai ki muqaddar bhī kuchh nahīñ

kahā maiñ us but-e-abrū-kamāñ kī ḳhidmat meñ
ḳhadañg-e-jabr ne tere kiyā hai mujh ko nigār

maiñ dil pe jabr karūñgā tujhe bhulā dūñgā
marūñgā ḳhud bhī tujhe bhī kaḌī sazā dūñgā

kaise amiir kis ke gadā tājdār kyā
dārul-fanā meñ jabr hai kyā iḳhtiyār kyā

har jabr pe sabr kar rahā huuñ
is tarah kahīñ ujaḌ na jā.ūñ

kab Dhalegī shām-e-ġham kab ḳhatm hogā zulm-o-jabr
zindagī insāñ kī hai unvāñ fasāne kā nahīñ

kuchh sādgī-e-tab.a thī kuchh maslahat kā jabr
kāñToñ ko pūjte rahe bāġh-o-bahār log

tumhāre jabr kī tā.īd thā mirā manshā
samajh meñ aa na sakā iḳhtiyār kis kā thā

un ke sitam bhī sah ke na un se kiyā gila
kyuuñ jabr iḳhtiyār kiyā haa.e kyā kiyā

ise vaqt kā jabr kahiye ki bechārgī jism o jaañ kī
makāñ khone vāloñ ko Dar hai ki ab lā-makāñ kho na jaa.e

zindagī jabr-e-musalsal ke sabab
sar-nigūñ sāyoñ kā sahrā-e-sukūt

magar haTe haiñ kahīñ jabr aur tashaddud miTe
vo falsafe ki jilā de ga.e dimāġhoñ ko

mufāhamat na sikhā jabr-e-nāravā se mujhe
maiñ sar-ba-kaf huuñ laḌā de kisī balā se mujhe

kasrat-e-āzār ne ta.alīm de dī zabt kī
jabr ke baa.is se dil ko sabr karnā aa gayā

jabr-e-hālāt kā to naam liyā hai tum ne
apne sar bhī kabhī ilzām liyā hai tum ne