Tags-Jafa

satāne vaalo qayāmat bhī aa.ī jaatī hai
jafā ke lutf tumhīñ ā.eñge vafā ke mujhe

merā ġhalat gila sahī zulm-o-jafā ravā sahī
nāz-e-sitam bajā sahī aañkh koī churā.e kyuuñ

mujhe Dasvāo ik mār-e-siyah se ye sazā diije
jafā kī apne sāhib kī jo zulf-e-ambarīñ pakḌī

har aan jafā jaan ke karte ho sitam hai
har saañs ye kahtī hai ki ho jān-e-vafā bhī

pā jā.egā dil us meñ bhī taḳhsīs ke pahlū
ma.alūm ye hotā to na karte vo jafā bhī

bā-vafā itnī jafā par kaun hai mere sivā
tujh se baḌh kar bad-gumāñ ai bevafā koī nahīñ

dil terī jafā se TuuT chukā ab chashm-e-karam aa.ī bhī to kyā
phir le ke isī TuuTe dil ko ummīd dobārā kaun kare

shikva karūñ tumhārī jafā kā to rū-siyāh
dekho na tum mujhe nigah-e-uzr-ḳhvāh se

sharm-e-jafā se chhupte ho tum dād-ḳhvāh se
uzr-e-gunah tumhārā hai bad-tar gunāh se

sar uThā.egī agar rasm-e-jafā mere ba.ad
mujh ko DhūñDegā mirā dasht-e-anā mere ba.ad

nadāmat ho mujhe apnī jafā par ye to mumkin hai
tirā dil ho pashīmān-e-jafā ye ho nahīñ saktā

vo baaz aa.eñ jafā-o-jaur se ye ġhair-mumkin hai
maiñ chhoḌūñ ḳhū-e-taslīm-o-razā ye ho nahīñ saktā

laa.eq vafā ke ḳhalq o sazā-e-jafā huuñ maiñ
jitne haiñ yaañ so nek haiñ jo kuchh burā huuñ maiñ

mausam-e-husn to thā fasl-e-jafā bhī aa.ī
saath hī saath javānī kī adā bhī aa.ī

laḌakpan jā chukā un kā javānī aane vaalī hai
kabhī mujh par jafā hotī thī lekin qahr ab hogā

har jafā terī munāsib har sitam terā durust
ab vahī merī tamannā hai jo tere dil meñ hai

mujhe kyuuñ aaj hichkī aa rahī hai
koī yaad aa.ī aur un ko jafā kyā

daġhā degā mujhe vo pur-jafā kyā
na aaḌe aa.egī merī vafā kyā

ronā yahī hai mujh ko terī jafā se har-dam
ye dil-dimāġh donoñ kab tak vafā kareñge

ek kam-zarf kī be-rabt jafā kī ḳhātir
shahr-vāloñ kī vafāoñ se ulajh baiThā huuñ