Tags-Jafa

terī jafā vafā sahī merī vafā jafā sahī
ḳhuun kisī kā bhī nahīñ to ye batā hai kyā shafaq

ye kudūrat ye adāvat ye jafā ḳhuub nahīñ
mujh ko miTTī meñ milā kar tumheñ kyā miltā hai

kam jo Thahre jafā se merī vafā
to ye pasañg hai tarāzū kā

maiñ tirī jafā se ḳhafā nahīñ mujhe tujh se koī gila nahīñ
mujhe fikr kyā hai ma.aal kī tujhe kyā milā hai vabāl meñ

rah gayā yaad tumheñ jaur-o-jafā zulm-o-sitam
lutf-o-altāf-o-ināyāt-o-karam bhuul ga.e

un se arz-e-karam to kyā karte
ham se ḳhud shikva-e-jafā na huā

dil intihā-pasand hai shauq-e-jagā nahīñ
vo mehrbāñ rahe to bahut mehrbāñ rahe

tum to ai mehrbān anūThe nikle
jab aan ke paas baiThe rūThe nikle

dil meñ ik jazba-e-bedād-o-jafā hī hogā
vo ḳhudā-vand bhī hogā to ḳhudā hī hogā

tujhe 'anjum' dard-e-firāq bhalā kyuuñ chain se uThne baiThne de
vo masīh na jab kuchh rahm kare kare kyuuñ na jafā-o-jaur maraz

aap kī baat chhoḌiye aap to be-misāl haiñ
husn-e-jafā-shi.ār ko kyuuñ na maiñ be-badal kahūñ

merī vafā kā un ko mile hashr meñ sila
mil jaa.eñ un ke naam ke jaur-o-jafā mujhe

ai jafā-kār dahr meñ tujh bin
kaun ham-sañg hai zamāne kā

kyā kyā jafā-kashoñ pe haiñ un dilbaroñ ke zulm
aisoñ ke sahte aise sitam aise shaḳhs haiñ

sitam kī kiije agar shikāyat to kahte haiñ bas tumheñ bhī dekhā
yahāñ kuchh aisī ġharaz hai kis ko kisī pe ham kyuuñ jafā kareñge

mujh ko is lafz kā mafhūm batā do yaaro
dostī naam hai jis kā vo jafā hai kyā hai

jafā-o-jaur ke qisse haiñ ab bhī mo'atabar 'fāriġh'
vafā kī baat zeb-e-dāstāñ mālūm hotī hai

ḳhvāh kare vafā-o-mehr ḳhvāh kare jafā-o-jaur
dilbar-e-shoḳh-o-shañg se ab to milā jo ho so ho