Tags-Jafa

jāntā kaun nahīñ ahd-e-vafā ko tere
vo bhī minjumla-e-andāz-e-jafā hai ai dost

vo tum ki tum ne jafā kī to kuchh burā na kiyā
vo maiñ ki zikr ke qābil nahīñ vafā merī

majbūriyoñ ko dekh ke ahl-e-niyāz kī
shāyān-e-e'tibār-e-jafā ho ga.e ho tum

ab yaad nasheman hai na bijlī kī jafā yaad
nikle the kuchh aise ki chaman tak na rahā yaad

āġhāz-e-jafā yaad na anjām-e-vafā yaad
jab sāmne tum aa.e to kuchh bhī na rahā yaad

ham dil pe sahe jaate haiñ har tīr-e-jafā ko
hai kis kā jigar dekhe jo ham dekh rahe haiñ

dostī kar ke 'qalaq' un se bahut pachhtātā
dushman-e-jāñ mire ḳhūbān-e-jafā-kār haiñ sab

zulf zanjīr-e-sitam teġh-e-jafā haiñ abrū
dil-e-vahshat-zada ab bachne kī sūrat kyā hai

morid-e-taqsīr gar hote to lāzim thī sazā
ye jafā phir kahiye ham par kis sabab karte haiñ aap

jafā o jaur-e-musalsal vafā o zabt-e-alam
vo iḳhtiyār tumheñ hai ye iḳhtiyār mujhe

des des phailā.ī kahānī
apnī vafā kī un kī jafā kī

dil meñ hamāre dard zamāne kā hai nihāñ
paivast dil meñ saikḌoñ paikāñ jafā ke dekh

nahīñ kartā maiñ jafā kā shikva
aap kyā kījiye aadat hī to hai

shab mai-ḳhāne kī mahfil meñ arbab-e-jafā kā zikr chalā
chup sunte rahe ham Darte rahe terā bhī na un meñ naam aa.e

ab ke shikast-o-reḳht kā kuchh aur hai sabab
ab ke ye zaḳhm terī jafā ne nahīñ diyā

koī agar jafā kare nahīñ hai kuchh gila mujhe
kisī kī baat aur hai tumhārī baat aur

maano kahā jafā na karo tum vafā ke ba.ad
aisā na ho ki pher leñ ulTī duā.eñ ham

be-zamīrī jafā-kashī nafrat
naam badle hue hai har miTTī

adā aa.ī jafā aa.ī ġhurūr aayā hijāb aayā
hazāroñ āfateñ le kar hasīnoñ par shabāb aayā

yaar ko madd-e-nazar mashq-e-jafā thī maiñ na thā
vaa.e qismat kal vahāñ merī qazā thī maiñ na thā