Tags-Jafa

ham us kī jafā se jī meñ ho kar dil-gīr
ruk baiThe to haiñ vale kareñ kyā taqrīr

ye nayā zulm na.ī tarz-e-jafā hai ki nahīñ
vo burā kah ke ye kahte haiñ sunā hai ki nahīñ

kahiye qissa koī arbāb-e-vafā kā 'sāqib'
chhoḌiye zikr jafā kā ki hai begāna-e-dil

dekh kar tafraqa-e-mehr-o-jafā ham samjhe
ek hī vaz.a kā bantā nahīñ kāshāna-e-dil

me.arāj-e-mohabbat meñ huiiñ lāzim-o-malzūm
hai ek kashish merī vafā terī jafā meñ

jafā ġham hijr ḳhvāhish yaad bāteñ
agar dekho to us meñ kyā nahīñ thā

shikve zabāñ pe aa sakeñ is kā savāl hī na ho
un se jafā kā zikr kyā jin ko ḳhayāl hī na ho

vafā karo jafā mile bhalā karo burā mile
hai riit desh desh kī chalan chalan kī baat hai

lutf-o-sitam vafā jafā yās-o-umīd qurb-o-bod
ishq kī umr kaT ga.ī chand tavahhumāt meñ

ham sahte rahe zulm aur jafā ye soch ke muñh se kuchh na kahā
Taltā hai kahīñ qismat kā likhā phir un se shikāyat kyā karte

na hoñ ḳhvāhisheñ na gilā koī na jafā koī
na savāl ahd-e-vafā kā ho vahī ishq hai

tumhārī shart-e-mohabbat kabhī vafā na huī
ye kyā huī tumhīñ kah do agar jafā na huī

jitne gile the un ke vo sab dil se dhul ga.e
jhepī huī nigāh talāfī jafā kī hai

jafā kā terī tālib huuñ vafā hai mudda.ā merā
yaqīn-e-nā-murādī par bhī dekho hausla merā

dil-āzārī kā baa.is ho nahīñ saktī jafā terī
vahī hai nā-murādī par bhī andāz-e-vafā merā

nahīñ ma.alūm kis par aaj phir mashq-e-jafā hogī
ki hai un ke laboñ par aaj phir zikr-e-vafā merā

āshiyāna jal gayā zulm-o-jafā-o-jaur kā
merī āh-e-ātishīñ ke 'barq' ban jaane ke ba.ad

dil saḳht hī kāfir kā par āñkhoñ meñ hayā hai
sunte hī jafā kā gila sharmā ga.iiñ āñkheñ

huuñ tīr-e-balā kā maiñ nishānā
shamshīr-e-jafā kā maiñ sipar huuñ

mismār ho ga.ī haiñ falak-bos chāhateñ
shahar-e-jafā se ab na mujhe yuuñ pukāriye