Tags-Jafa

vo vafā thī yā jafā achchhī lagī
ham ko terī har adā achchhī lagī

ġharīb aajiz jafā ke maare faqīr be-kas gadā tumhāre
so veñ sitam siiñ mareñ bichāre agar jo un par karam na kiije

jafā kā us kī gilā mat karo huā so huā
ḳhudā ke vāste chupke raho huā so huā

ruuh arbāb-e-mohabbat kī laraz jaatī hai
tū pashemān na ho apnī jafā yaad na kar

na.e sire se chalo koī ahd karte haiñ
vafā jafā kā purānā hisāb rahne do

jab se lazzat-kash-e-jafā hai dil
hājat-e-chashm-e-iltifāt ga.ī

ye dekhnā hai ki ba.ad-e-tark-e-ta.alluqāt ai 'shakīl' kab tak
na koī ham par jafā karegā na ham kisī se vafā kareñge

ḳhuub dil khol kar jafā kar lo
banda muddat se is kā ḳhūgar hai

ġhairoñ ko atā aur jafā mere liye hai
ḳhush huuñ ki mohabbat kī sazā mere liye hai

haa.e kis dhuum se niklā hai shahīdoñ kā julūs
jurm chup sar-ba-garebāñ hai jafā āḳhir-e-shab

ġhair jaur-o-jafā o be-mehrī
ham se is kā nahīñ hai aur shi.ār

andāz jafā badal ke dekho to sahī
paañv se ye phuul mal ke dekho to sahī

karte nahīñ jafā bhī vo tark-e-vafā ke saath
ye kaun sā sitam hai dil-e-mubtalā ke saath

us se kah do ki vo jafā na kare
kahīñ mujh sā use ḳhudā na kare

zahe-nasīb ki apne vafā-shi.āroñ meñ
mujhī ko chun liyā us shoḳh ne jafā ke liye

jahāñ meñ hai har ik ik na ik adā ke liye
koī vafā ke liye hai koī jafā ke liye

ye fitrat husn kī hai aur vo tīnat mohabbat kī
jise tum ne jafā samjhā use ham ne vafā jaanā

kis jafā-kār kī vafā hai jaañ
kis sitam-kash kā mudda.ā hai dil

dushman-e-jāñ koī banā hī nahīñ
itne ham lā.iq-e-jafā hī nahīñ

naala juz husn-e-talab ai sitam-ījād nahīñ
hai taqāzā-e-jafā shikva-e-bedād nahīñ