Tags-Jafa

jafā se unhoñ ne diyā dil pe daaġh
mukammal vafā kī sanad ho ga.ī

aaj dil khol ke tum zulm-o-sitam kar Daalo
phir chalāoge kahāñ teġh-e-jafā mere ba.ad

sitam bhī lutf ho jaatā hai bhole-pan kī bātoñ se
tujhe ai jaan andāz-e-jafā ab tak nahīñ aayā

āshiqoñ hī kā jigar hai ki haiñ ḳhursañd-e-jafā
kāfiroñ kī hai ye himmat na musalmānoñ kī

rū-ba-rū us ke rahī aa.ina ban kar shāhīn
dekh le apnī nazar jurm-e-jafā se pahle

ye vafā māñge hai tum se na jafā māñge hai
merī māsūm jabīñ ek ḳhudā māñge hai

vo sunnī bachcha kaun thā jis kī jafā ne 'jaun'
shii.ā banā diyā hameñ shii.ā kiye baġhair

jo muhibbā-e-vafā haiñ vo vafā karte haiñ
kuchh ġharaz is se nahīñ koī jafā karte haiñ

umiid un se vafā kī to ḳhair kyā kiije
jafā bhī karte nahīñ vo kabhī jafā kī tarah

bāvajūd is jafā ke pyāre tum
kis qadar mere man ko bhāte ho

'ehsān' hai be-sūd gila un kī jafā kā
chāhā thā unheñ ham ne ḳhatā-vār hamīñ the

maujūd hai jo laao jo matlūb hai vo lo
mushtāq-e-vafā tum ho talabgār-e-jafā ham

kaun sī baat tirī ham se uThā.ī na ga.ī
par jafā-jū tirī ye nit kī laḌā.ī na ga.ī

kyā ḳhuub vo ḳhud karte haiñ yuuñ apnī satā.ish
aafat huuñ jalāne meñ qayāmat huuñ jafā meñ

husn hai mahz jafā ishq hai tasvīr-e-vafā
rabt kā kuchh to sabab mujh ko batā.e koī

jafā-o-sitam ke añdheroñ meñ mil kar
bane ḳhalq meñ chāñd taare kanhaiyā

tire kūcha-e-zulf meñ dil hai mirā ab use maiñ samajhtā huuñ dām-e-balā
ye ajiib sitam hai ajiib jafā ki yahāñ na rahe to kahīñ na rahe

'shauq' un ke sitam kī latāfat na pūchh
dil taḌaptā hai ab tak jafā ke liye

us jafā-kesh ko hai aaj talāsh-e-ushshāq
shauq-e-dīdār meñ mushtāq-e-sitam jaate haiñ

kab lag sake jafā ko us kī vafā-e-ālam
hai jis kā har karishma sabr-āzmā-e-ālam