Tags-Jafa

jafā-o-zulm ke is tund tez tūfāñ meñ
vo mujh se kahte haiñ sham-e-vafā jalāne ko

mujh se ik ḳhasta se nāhaq ye shab o roz ḳhalish
ai jafā-pesha ye kyā nahv-e-sitam-keshī hai

vafā ke barābar jafā chāhtā huuñ
tirā hausla dekhnā chāhtā huuñ

is adā se vo jafā karte haiñ
koī jaane ki vafā karte haiñ

ulTe vo shikve karte haiñ aur kis adā ke saath
be-tāqatī ke ta.ane haiñ uzr-e-jafā ke saath

husn ġhamze kī kashākash se chhuTā mere ba.ad
baare ārām se haiñ ahl-e-jafā mere ba.ad

tire firāq ke sadme qubūl haiñ lekin
jafā ke ba.ad chale to vafā kā daur chale

ḳhūgar-e-jaur pe thoḌī sī jafā aur sahī
is qadar zulm pe mauqūf hai kyā aur sahī

vo jafā-gar falak sitamgar hai
kise achchhā kise burā kahiye

tere jaur-o-jafā ko kyā kahiye
naaz kahiye unheñ adā kahiye

raqīboñ par adū par ġhair par charḳh-e-sitamgar par
jafā kyā kar nahīñ sakte haiñ vo lekin nahīñ karte

bejā hai tirī jafā kā shikva
maarā mujh ko mirī vafā ne

lutf kā rabt hai koī na jafā kā rishta
dil se kuchh duur hai zālim kī anā kā rishta

na jafā se hai mere dil ko qarār
na tasallī vafā se hotī hai

kis jafā-kār se ham ahd-e-vafā kar baiThe
āḳhir is baat ne ik roz pashemān kiyā

haa.e us dast-e-karam hī se mile jaur-o-jafā
mujh ko āġhāz-e-mohabbat hī meñ mar jaanā thā

le ke dil mehr se phir rasm-e-jafā-kārī kyā
tum dil-ārām ho karte ho dil-āzārī kyā

tū jafā meñ mast hai roz-o-shab maiñ kafan-ba-dosh ġhazal-ba-lab
tire ro.ab-e-husn se chup haiñ sab maiñ bhī chup rahūñ to mazā hai kyā

yaar ko tarz-e-jafā se nahīñ rakhne kā baaz
nāsehā har ghaḌī mujh ko hī to samjhāvegā

husn-e-kāfir ho gayā āmāda-e-tark-e-jafā
phir 'asad' merī tabāhī kā zamāna aa gayā