Tags-Jafa

jafā un kī vafā merī vafā merī jafā un kī
mohabbat dāstāñ-dar-dāstāñ mālūm hotī hai

aisā kabhī dekhā na sunā jaur kā ḳhūgar
har baar jafā kar ke bhī hotā thā ḳhafā vo

ḳhvāhish-e-dād-rasī kyā ho sitam-gar se jahāñ
aañkh meñ shā.iba-e-uzr-e-jafā bhī na mile

vo jafā-shi.ār o sitam-adā tū suḳhan-tarāz o ġhazal-sarā
vo tamām kāñTe ugā.eñge tū tamām phuul khilā.e jā

vo sarfarāz huā kārobār-e-ulfat meñ
barā-e-mashq-e-jafā jis kā intiḳhāb huā

ye kis ke naam pe teġh-e-jafā nikaltī huī
ye kis ke ḳheme, ye ḳheme jalāne vaalā kaun

ahl-e-jafā se haath milāte
ho ga.e mere baazū patthar

ham is shahr-e-jafā-pesha se kuchh ummīd kyā rakkheñ
yahāñ is hāv-hū meñ ḳhāmushī ko kaun likkhegā

jafā par sabr sīkhā hai vafā par jaan jaatī hai
yahī hai aur kis ko tohmat-e-mardāna kahte haiñ

na uThā ḳhāk-e-muzillat se kabhī misl-e-sarishk
jo nazar se tire ai shoḳh-e-jafā-kār girā

kartā hai ai 'asar' dil-e-ḳhūñ-gashta kā gila
āshiq vo kyā ki ḳhasta-e-teġh-e-jafā na ho

jafā un kī vafā-parvar vafā merī jafā-parvar
vo un ko umr-bhar karnā ye mujh ko umr-bhar karnā

jafā kar shauq se tū zabt par mere na jā hargiz
shikāyat kyā mujhe ye kaam hai jab umr bhar karnā

abhī tak un ke vahī sitam haiñ jafā kī ḳhū bhī nahīñ ga.ī hai
vo ranjisheñ bhī nahīñ ga.ī haiñ vo guftugū bhī nahīñ ga.ī hai

hai zulm tirā aam bahut phir bhī sitamgar
maḳhsūs ye andāz-e-jafā mere liye hai

maiñ burā hī sahī bhalā na sahī
par tirī kaun sī jafā na sahī

yahī vafā kā hai dastūr bhī taqāzā bhī
ki har jafā ko sitamgār kī adā kahiye

jab bhī mirī vafāoñ kī baat aa ga.ī kahīñ
un ko phir ek uzr-e-jafā sochnā paḌā

be-niyāzī suuñ terī jāñ-ba-lab aayā hai mujhe
chhoḌ kar taur-e-jafā kuchh rah-e-ehsān meñ aa

īd-e-qurbāñ hai butāñ kyuuñ nahīñ sargarm-e-jafā
qatl-e-ushshāq samajhte haiñ savāb aaj ke din