Tags-Jafa

shikva us but ke jafā kā jo kiyā maiñ to kahā
tum to duniyā meñ ho ik ahl-e-vafā tum ko kyā

tavāzun rishtoñ meñ rakkhā hai qaa.em
jafā ne aap kī merī vafā ne

jafā ho yā ki vafā maiñ asīr-e-dard rahā
kisī bhī taur na aayā kabhī qarār mujhe

ab e'tirāf-e-jafā aur kis tarah hogā
ki terī bazm meñ qisse mirī vafā ke chale

is jaur o jafā se tire zinhār na TuuTe
ye dil to kisī tarah se ai yaar na TuuTe

vo shīsha-e-dil hai ki isī sañg-e-jafā par
sau baar agar pheñkiye yak-bār na TuuTe

bahut basīt hai dasht-e-jafā kī tanhā.ī
qarīb-o-dūr koī āhū-e-vafā bhī nahīñ

jafā-dost us ko kahtā hai koī koī vafā-dushman
hamāre saath to us ne nibāhī dostī achchhī

vāqif haiñ ḳhuub aap ke tarz-e-jafā se ham
iz.hār-e-iltifāt kī zahmat na kījiye

vo kam-nasīb jo ahd-e-jafā meñ rahte haiñ
ajiib ma.ariz-e-karb-o-balā meñ rahte haiñ

ga.e jī se chhūTe butoñ kī jafā se
yahī baat ham chāhte the ḳhudā se

zauq-e-pāband-e-vafā kyuuñ rahe mahrūm-e-jafā
ishq majbūr sahī husn to majbūr nahīñ

jafā ho yā vafā ham sab meñ ḳhush haiñ
kareñ kyā ab to dil aTkā huā hai

sitam hī karnā jafā hī karnā nigāh-e-ulfat kabhī na karnā
tumheñ qasam hai hamāre sar kī hamāre haq meñ kamī na karnā

āshnā.ī butoñ se kar baiThe
āshnā-e-jafā ne luuT liyā

jafā ho yā vafā us kā karam yuuñ bhī aur yuuñ bhī
navāzish roz-o-shab aur dam-ba-dam yuuñ bhī hai aur yuuñ bhī

itnī jafā-tarāziyāñ itnī sitam-shi.āriyāñ
tum bhī chale ho kuchh qadam ahl-e-vafā ke saath saath

kuchh imtihān-e-dast-e-jafā kar chuke haiñ ham
kuchh un kī dastaras kā patā kar chuke haiñ ham

vafāoñ kā natīja ham to jo kuchh hai samajhte haiñ
magar ai kaash anjām-e-jafā vo bhī kabhī samjhe

sitam hī karnā jafā hī karnā nigāh-e-ulfat kabhī na karnā
tumheñ qasam hai hamāre sar kī hamāre haq meñ kamī na karnā