Tags-Jafa

sitam āzār zulm o jaur o jafā
jo kiyā so bhalā kiyā sāhab

tumheñ to aur bhī ashḳhās pyaar karte haiñ
hameñ ye jaur-o-jafā mehrbāñ bahut achchhā

tujh meñ to ek ḳhū-e-jafā aur ho ga.ī
maiñ aur ho gayā na vafā aur ho ga.ī

kis se luuñ dād-e-vafā kis ko dikhā.ūñ ye jafā
vo to parde meñ hai jis ne mujhe ījād kiyā

mujhe ḳhabar hai ki vo peshtar na thā aisā
mirī vafā se jafā kā use ḳhayāl huā

phir dil se 'fānī' saare ke saare naqsh-e-jafā miT jaate haiñ
jis vaqt vo zālim sāmne aa kar jān-e-hayā ho jaatā hai

kabhī kabhī ye binā-e-karam bhī hotī hai
jafā-e-yār se andāza-e-jafā na kare

kis tarah kahtā koī tujh ko sitamgar ai dost
sach to ye hai ki hameñ terī jafā aur lagī

shoḳhī se vo mānā-e-sitam pūchh rahe haiñ
ab lafz-e-jafā bhī unheñ goyā nahīñ aatā

mue sahte sahte jafā-kāriyāñ
koī ham se sīkhe vafādāriyāñ

vo hī be-sāḳhta sī sādgī ke pal ji.eñ phir se
vafā kā yā jafā kā zikr thā na naam rishtoñ kā

ye to Thiik hai ki tirī jafā bhī ik atā mire vāste
mirī hasratoñ kī qasam tujhe kabhī muskurā ke bhī dekh le

vafā kā zikr hī kyā hai jafā bhī raas aa.e
vo muskurā.e to jurm-e-ḳhatā bhī raas aa.e

sitam-shi.ār azal se hai husn kī fitrat
jo maiñ vafā bhī na kartā to vo jafā karte

mumtāz haiñ kushtagān-e-ma.ashūq
hai ain karam agar jafā ho

sitam-e-nā-ravā ko rote haiñ
charḳh terī jafā ko rote haiñ

ham ne terī jafā ke parde meñ
ḳhud bhī dil par bahut sitam Dhāyā

na gayā ḳhayāl-e-zulf-e-siyah jafā.-sha.ārāñ
na huā ki sub.h hove shab-e-tīra rozgārāñ

dekho na kabhī ḳhū-e-sitam apnī badalnā
miltā hai mazā ham ko bahut jaur-o-jafā meñ

jab bhī vālid kī jafā yaad aa.ī
apne daadā kī ḳhatā yaad aa.ī