Tags-Jafa

marzi-e-yār ke ḳhilāf na ho
kaun kahtā hai vo jafā na kareñ

un meñ ḳhush-kār bhī haiñ un meñ riyā-kār bhī haiñ
un meñ ġham-ḳhvār bhī haiñ un meñ jafā-kār bhī haiñ

vo pahlī sab vafā.eñ kyā huiiñ ab ye jafā kaisī
vo pahlī sab adā.eñ kyā huiiñ ab ye adā kyuuñ hai

dil-e-ḳhūñ-gashta-e-jafā pe kahīñ
ab karam bhī garāñ na ho jaa.e

jafā un se mujh se vafā kaise chhūTe
ye sach hai nahīñ chhuTtī aadat kisī kī

paḌe haiñ ham ḳhūn-e-dil meñ ġhaltāñ jigar hai dāġh-e-jafā se sozāñ
koī hai apne ta.iiñ sambhāle ze-āb avval do.am ba-ātish

pūchhā ki vaj.h-e-zindagī bole ki dildārī mirī
pūchhā ki marne kā sabab bole jafā-kārī mirī

apne marne kā agar rañj mujhe hai to ye hai
kaun uThā.egā tirī jaur o jafā mere ba.ad

maqtūl lākhoñ ho chuke shā.eq hazār-hā
lazzat ajiib yaar kī teġh-e-jafā meñ hai

vo kabhī apnī jafā par na huā sharminda
ham samajhte rahe patthar bhī pighal jaate haiñ

jafā se fitrat-e-āsūdgāñ tāmīr kī tum ne
vafā ko qismat-e-āshufta-hālāñ kar diyā ham ne

nafrat kī āñdhiyoñ kī jafā-kāriyāñ na pūchh
pattoñ kī tarah shāḳh se ham TūTne lage

ishāra ḳhanjar-e-abrū kā bas thā
mujhe maarā abas teġh-e-jafā se

husn-e-muḳhtār sahī ishq bhī majbūr nahīñ
ye jafāoñ pe jafā ab mujhe manzūr nahīñ

gar jaur-o-jafā kare to in.aam samajh
jis kaam se vo ḳhush ho use kaam samajh

ik phir ke dekhne meñ ga.ī saikḌoñ kī jaañ
terī har ik adā meñ bharī hai jafā ġharaz

tujh ko manzūr jafā mujh ko hai matlūb vafā
na ye bhātā hai tujhe aur na vo bhātā hai mujhe

ye pūchhnā hai ki ġhairoñ se kiyā milā tujh ko
tirī jafā kī shikāyat to kaun kartā hai

tab-e-jafā-shi.ār kī tafrīh ke liye
naala mirā tarāna-e-murġh-e-chaman huā

ḳhuub hai tum meñ jafā kī na rahegī aadat
mere badle bhī raqīboñ pe karam aur sahī