Tags-Jafa

kahte haiñ zulm ke ba.ad aah karoge to kyā
lashkar-e-jaur-o-jafā meñ ye alam aur sahī

maiñ nālāñ na thā tere jaur-o-jafā se
zamāne ke dil kyuuñ dukhā.e ga.e haiñ

mire jurm-e-ishq kī is qadar mujhe ai nadīm sazā na de
mire dil pe itnī jafā na kar mujhe yuuñ nazar se girā na de

ye soch kar na 'munavār' ne kuchh kiyā shikva
vafā kī daad kā pahlū bhī hai jafā meñ tirī

vafā jafā ne ye kī jañg-e-zar-garī ham se
vafā ne bātoñ lagāyā jafā ne luuT liyā

un bad-diloñ ne ishq ko bad-nām kar diyā
jo murtakib shikāyat-e-jaur-o-jafā ke haiñ

sitam ke ba.ad karam kī adā bhī ḳhuub rahī
jafā to ḳhair jafā thī vafā bhī ḳhuub rahī

huuñ fareb-e-sitam-e-yār kā qaa.il 'akbar'
marte marte na khulā ye ki jafā hotī hai

ye jo kahnā hai ki har husn jafā-pesha hai
ek tohmat hai mire rashk-e-adn kī had tak

jise ḳhud aap hī apne pe pyaar aa jaa.e
jafā ke daur meñ vo laġhzish-e-vafā huuñ maiñ

baaqī rahegā jaur-o-sitam roz-e-hashr lag
tujh zulf kī jafā meñ nipaT imtidād hai

kyā ābrū-e-ishq jahāñ aam ho jafā
ruktā huuñ tum ko be-sabab āzār dekh kar

sitam kī teġh chalī tiir bhī jafā ke chale
jo baat haq thī sar-e-dār ham sunā ke chale

jis haath meñ hai teġh-e-jafā us kā naam lo
'majrūh' se to saa.e ko qātil kahā na jaa.e

rakhte rishtoñ meñ yuuñ tavāzun ham
kuchh vafā karte kuchh jafā karte

silsila un ke sitam kā na rahā mere ba.ad
badlā badlā sā hai dastūr-e-jafā mere ba.ad

jafā Dhāte raheñge bas yūñhī din-rāt dar-parda
samajh baiThe haiñ vo badnām to charḳh-e-kuhan hogā

ishq kī sūrat jo badle to ho āshiq bhī kuchh aur
ye jafā-o-jaur kā har vaqt ḳhvāhāñ ab bhī hai

kaam hai un kā jafā vo bā-vafā kahne ko haiñ
dete haiñ jo dard-e-dil ahal-e-shifā kahne ko haiñ

zamīñ pe dil kī mohabbat javān hotī rahī
vafā kī dhuup pe bādal jafā ke chhāne tak