Tags-Jafa

bā-vafā.ī kī adā paane lagā huuñ tujh meñ
ai jafā-dost ye kyā dekh rahā huuñ tujh meñ

jafā-o-jaur-e-gul-chīñ se chaman mātam-kada sā hai
phaḌakte haiñ qafas kī tarah āzādī meñ par vaale

kyā batā.eñ zindagānī ishq kī kaise kaTī
vo jafā karte rahe aur ham vafā karte rahe

koī hazār miTā.e ubharte aa.e haiñ
ham ahl-e-dard junūn-e-jafā se haare kyā

go samajhtā nahīñ par husn-e-talāfī dekho
shikva-e-jaur se sargarm-e-jafā hotā hai

aañkh meñ ḳhema-zan nīl-gūñ vus.ateñ apnā pahlā qadam hī ḳhalāoñ meñ hai
jo jafā ke jazīra-numāoñ meñ hai dil kā us ḳhāk-e-ḳhasta se naatā rahā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ye re.āyā-e-hind tabah huī kahūñ kyā jo in pe jafā huī
jise dekhā hākim-e-vaqt ne kahā ye bhī qābil-e-dār hai

kuchh tirī teġh-e-jafā kī nahīñ taqsīr ai gul
sūrat-e-ġhuncha mirā dil hai figār aap se aap

surūd-e-ġham par bhī zindagī meñ tarab ke dhāre bahā rahā huuñ
maiñ un ke sāz-e-jafā par apnī vafā ke naġhme sunā rahā huuñ

kaun kahtā hai jafā karte ho tum
shart-e-māshūqī vafā karte ho tum

sañg-e-jafā kā ġham nahīñ dast-e-talab kā Dar nahīñ
apnā hai us par āshiyāñ naḳhl jo bārvar nahīñ

haañ jo jafā bhī aap ne kī qā.ede se kī
haañ ham hī kārband-e-usūl-e-vafā na the

ab tak kabhī ke miT ga.e hote jafā se ham
zinda haiñ ai 'rashīd' kisī kī duā se ham

jo chāhe kar jaur-o-jafā par dil kā mohr-e-dāġh se
roz-e-qayāmat kosnā dikhlā.eñge mahzar bhī ham

ahl-e-jafā se kahnā tarāsheñ salīb-o-dār
shāyān-e-sarv-qāmat-e-dil-dār ab koī

kahāñ vo sard-mehrī thī kahāñ ye garm-joshī hai
ajab kyā is karam meñ bhī koī tarz-e-jafā nikle

agar ġhaflat se baaz aayā jafā kī
talāfī kī bhī zālim ne to kyā kī

jafā se thak ga.e to bhī na pūchhā
ki tū ne kis tavaqqo par vafā kī