Tags-Jafa

mare āġhāz-e-ulfat meñ ham afsos
use bhī rah ga.ī hasrat jafā kī

jahāñ koī sitam ījād kiyā mujhe kah ke falak ne ye yaad kiyā
ki bas ek dil-e-'bedam' ke sivā koī qābil-e-mashq-e-jafā hī nahīñ

paikar-e-zulm-o-jafā arsh na hil jaa.e kahīñ
dil dukhānā kisī bekas kā burā hotā hai

sitam bhī ho to mujh par ho jafā bhī ho to mujh par ho
mujhe is rashk ne maarā vo kyuuñ aalam kā qātil hai

ham is shahr-e-jafā-pesha se kuchh ummīd kyā rakkheñ
yahāñ is hāv-hū meñ ḳhāmushī ko kaun likkhegā

abrū ne tire khīñchī kamāñ jaur-o-jafā par
qurbāñ karūñ sau jiiv tire tīr-e-adā par

tum jaur-o-jafā karo jo chāho
in bātoñ pe kab mujhe nazar hai

pairahan adl kā pahan aa.ī
kaun mazlūm hai jafā kyā hai

udū likkhe mujhe naama tumhārī mohr us kā ḳhat
jafā yuuñ bhī hai aur yuuñ bhī sitam yuuñ bhī hai aur yuuñ bhī

mile ġhairoñ se mujh ko ranj o ġham yuuñ bhī hai aur yuuñ bhī
vafā-dushman jafā-jū kā sitam yuuñ bhī hai aur yuuñ bhī

be-vafā bhī ho sitamgar bhī jafā-pesha bhī
ham ḳhudā tum ko banā leñge tum aao to sahī

jafā jab tak ki chauñkātī nahīñ hai
mohabbat hosh meñ aatī nahīñ hai

vafādār ho yā jafā-kār tum ho
jo kuchh ho so ho par mire yaar tum ho

vafā meñ be-vafā.ī be-vafā.ī meñ vafā kaisī
vafā ho to jafā kyuuñ ho jafā ho to vafā kyuuñ ho

hogā tavīl aur bhī afsāna-e-vafā
ahl-e-jafā ke tantana-e-muḳhtasar ke ba.ad

teġh o kamand maañg kar abrū o zulf se
āshiq bahut hue haiñ jafā-kār maar Daal

baḌho kuchh aur ki tārīkī-e-jafā kam ho
isī tarah se charāġh-e-vafā jalā.e hue

na vo iḳhlās-o-mohabbat hai na vo mehr-o-vafā
sheva-e-jaur-o-jafā-o-sitam iz.hār hue

ye to hargiz hī na thī tum se tavaqqo ham ko
ki sitamgār dil-āzār jafā-kār hue

go ki mar jaa.e tire ishq meñ 'joshish' lekin
shikva-e-jaur-o-jafā muñh pe nahīñ laane kā