Tags-Jalwa

ye kis ne jalva hamāre sar-e-mazār kiyā
ki dil se shor uThā haa.e be-qarār kiyā

un ke aage har nayā maidān hogā jalva-gāh
aur tirā stage hogā sirf shauhar kī nigāh

jalva-farmā hai jo apne andar use
dam-ba-dam dekhiye jā-ba-jā dekhiye

ism-o-sifat kā jalva ism-o-sifat meñ dekhā
har zaat kuuñ ḳhudā kī maiñ ain-e-zāt paayā

sūrat-e-lafz-o-ibārāt-o-ma.ānī andar
jalva-gar tuuñ che huā hai mere dīvān meñ aa

ye nahīñ to pher le āñkheñ ye jalva aur hai
terī duniyā aur hai shā.er kī duniyā aur hai

dair meñ DhūñDhtā huuñ ka.aba-nashīñ ko zāhid
vahī jalva jo udhar hai vo idhar hai ki nahīñ

lan-tarānī ko zarā ġhaur se samjho muusā
jalva-e-hashr tumheñ madd-e-nazar hai ki nahīñ

yuuñ to is jalva-gah-e-husn meñ kyā kyā dekhā
jab tujhe dekh chuke koī na tujh sā dekhā

usī shām-e-marg kī tīrgī meñ haiñ jalva-hā-e-hayāt bhī
unhīñ zulmatoñ ke hijāb meñ ye chamak ye raqs-e-sharar bhī hai

barq-e-jamāl-e-yār ye jalva hai yā hijāb
chashm-e-adā-shanās ko hairāñ banā diyā

firāqe-e-gul se jo nāla-kash hai qafas meñ bulbul shahīd-e-jalva
bahār-e-gulshan ḳhizāñ-numā hai junūñ-zada abr-e-bahmanī hai

uThā hī deñge naqāb apnī dikhā hī deñge vo apnā jalva
nibhegī kab tak ye lan-tarānī ye lan-tarānī hai aur ham haiñ

māthe pe husn-ḳhez hai jalva gulāl kā
biñdī se auj par hai sitāra jamāl kā

ziyāda chāñd sūraj se tirā nuur āshkārā hai
na dekheñ terā jalva ham qusūr apnī basārat kā

dikhāyā us ne ban-Than kar vo jalva apnī sūrat kā
ki paanī phir gayā ā.īne par dariyā-e-hairat kā

jalva-gar sochoñ meñ haiñ kuchh āgahī ke āftāb
raushnī se likh rahā huuñ zindagānī kā nisāb

hayā kī bahāreñ haiñ ra.anā.iyoñ par
ye jalva hai mastī hai joban hai kyā hai

tujh bin nahīñ ye jalva-numā shab ko māhtāb
chashm-e-falak safed hue intizār meñ

jab hijāboñ meñ pinhāñ thā husn-e-butāñ but-parastī kā bhī ek meyār thā
ab to har moḌ par but hī but jalvagar ab kahāñ tak butoñ ko ḳhudā māniye