Tags-Jalwa

ek le de ke tamannā hai so vo bhī nākām
dil meñ kyā hai jo tirī jalva-gah-e-nāz meñ hai

dil na sambhlā thā agar dekh ke jalva us kā
tū ne ai dard-e-jigar uTh ke sambhālā hotā

us kā jalva jo koī dekhne vaalā hotā
vāda-e-dīd qayāmat pe na Taalā hotā

mere ghar meñ chhā rahī thī shām-e-ġham kī tīrgī
jab ujālā ho rahā thā jalva-gāh-e-nāz meñ

jahāñ koī dekhā hasīñ jalva-ārā
vahīñ ham ne apnī javānī luTā dī

har ghaḌī thī jis ke jalve kī nigāhoñ ko talāsh
nuur us kā aañkh meñ vo dil ke kāshāne meñ thā

jalva farmātā vo ka.abe meñ na but-ḳhāne meñ thā
DhūñDhtā thā jis ko maiñ vo dil ke kāshāne meñ thā

dil arsh-gāh-e-husn hai dil jalva-gāh-e-nāz
ye aap hī kā ghar hai hamārī guzar kahāñ

dekhe tire jalva ko bāmhan kī jo beTī bhī
muñh se vahīñ kalme ko yakbār lage japne

koī paatā nahīñ tujhe 'markaz'
dū-ba-dū aap jalva-gar hai tū

aap har shai meñ jalva-farmā haiñ
be-ḳhabar kyā hai bā-ḳhabar hai tū

har ik jagah tū hī jalva-gar hai vo but-kada ho yā tūr-e-sīnā
nigāh-e-duniyā hai kor bātin tirī tajallī kidhar nahīñ hai

sub.h-e-mahshar huī shab-e-tārīk
sūrat-e-yār jalva-gar na huī

is tarah kuchh rañg bhar jaatā nigāh-e-shauq meñ
jalva ḳhud betāb ho jaatā vo parda dekhte

aaj kyuuñ ashkoñ meñ hai aks-e-tabassum jalva-gar
aa ga.ī kyā apnī had par ġham ke mustaqbil kī baat

āñkhoñ meñ chubh rahī hai guzartī rutoñ kī dhuup
jalva dikhā.e ab to na.e mausamoñ kī dhuup

hai ā.īne ke muqābil jo hū-ba-hū kyā hai
ye merā ruup nahīñ hai to jalva-rū kyā hai

shikast-e-husn kā jalva dikhā ke luuT liyā
nigāh nīchī kiye sar jhukā ke luuT liyā

merī hastī bhī tire jalvoñ meñ gum hotī ga.ī
terā jalva bhī faroġh-e-lā-makāñ bantā gayā

husn-e-azal ne pahle hameñ jalva-gar kiyā
duniyā-e-hast-o-būd se phir be-ḳhabar kiyā