Tags-Jalwa

merī āñkhoñ meñ un kā jalva hai
aa.ine meñ charāġh jaltā hai

jalva-gar dil meñ ḳhayāl-e-āriz-e-jānāna thā
ghar kī zīnat thī ki zīnat-baḳhsh sāhab-ḳhāna thā

koī jalva hai na chehra na tajallī na kiran
aa.ine be-sar-o-sāmāñ hue kaise kaise

kis ko hai tāb-e-nigāhī tirā jalva dekhe
aa.ina ḳhud bhī to hairāñ na huā thā so huā

husn jalva dikhā gayā apnā
ishq baiThā rahā udaas kahīñ

ye jo har shai meñ tirī jalvagarī hai ai dost
ye bhī merī vasī-un-nazarī hai ai dost

tūr-e-dil kī ḳhair ho ab tāb-e-nazzāra kahāñ
husn kā jalva tumhāre barq gir jaane kā naam

sajda jise kareñ haiñ vo har-sū hai jalva-gar
jīdhar tirā mizāj ho ūdhar namāz kar

ka.aba bhī ghar apnā hai sanam-ḳhāna bhī apnā
har husn kā jalva mirā īmān-e-nazar hai

qasr-e-shāhī meñ ki mumkin nahīñ ġhairoñ kā guzar
ek din nūr-jahāñ baam pe thī jalva-figan

tū ai asīr-e-makāñ lā-makāñ se duur nahīñ
vo jalva-gāh tire ḳhāk-dāñ se duur nahīñ

baġhair jalva dikhā.e rahe na ye ma.ashūq
jo saat parde ke andar use chhupā ke piyūñ

vo thā jalva-ārā magar tū ne muusā
na dekhā na dekhā na dekhā na dekhā

sahrā meñ ThanDe vaqt hameñ yaad aa.ī jo us kī jalvagarī
kuchh aisī huī vahshat dil ko dam jā ke zer-e-bām liyā

sumbul hai jiyūñ ki jalva-numā jūebār par
āñkhoñ meñ merī aks do-zulf-e-siyāh kā

gul jalva-gar haiñ āmad-e-fasl-e-bahār hai
kar bāġhbāñ nasheb-o-farāz-e-chaman durust

damā-dam sho.abde ham ko dikhātā hai koī jalva
kahīñ shaiḳh-e-haram ho kar kahīñ pīr-e-muġhāñ ho kar

jalva har-gām sar-e-rāh guzar terā hai
aañkh merī hai magar husn-e-nazar terā hai

sau ka.aba-e-dīn the jalva-afroz
ḳhum-ḳhāne meñ aaj jo ga.e ham

dekhā jo us sanam ko to mahsūs ye huā
jalva ḳhudā kā sūrat-e-insān ho gayā