Tags-Jalwa

jis ne ik jalva ko dekhā jī diyā parvāna-vār
is qadar ai sham.a-rūyāñ husn-sāzī kījiye

us māh-rū pe aañkh kisī kī na paḌ sakī
jalva thā tuur kā ki sarāsar vo nuur thā

tirā jalva bhī jab terā hī parda hotā jaatā hai
to phir merī nigāhoñ par nigāhoñ kā gumāñ kyuuñ ho

mujhe yaqīn thā is tajrabe se pahle bhī
sunā hai ġhair se jalva nahīñ sahārā gayā

hai us ke aks-e-gurezāñ kī jalva-ārā.ī
ab apne ghar meñ raho āstāñ se kuuch karo

dil-o-dīn-o-ḳhirad tārāj-e-nāz-e-jalva-pairā.ī
huā hai jauhar-e-ā.īna ḳhel-e-mor ḳhirman meñ

baġhal-gīr aarzū se haiñ murādeñ aarzū mujh se
yahāñ is vaqt to ik iid hai tum jalva-gar kyā ho

ā.īna aks-e-jalva se TuuTā nahīñ kabhī
dil yūrish-e-jamāl se hairāñ na ho sakā

mujhī ko parda-e-hastī meñ de rahā hai fareb
vo husn jis ko kiyā jalva-āfrīñ maiñ ne

hujūm-e-nāz meñ jalva-farebiyoñ ke sivā
'kalīm' aur koī hādisa huā to nahīñ

husn kī dil meñ mire jalvagarī rahtī hai
band is shīsha-e-nāzuk meñ parī rahtī hai

mai-e-gul-gūñ ke jo shīshe meñ parī rahtī hai
chash-mastoñ meñ ajab jalvagarī rahtī hai

asar us kī chashm-e-karam kā ab karūñ kis zabān se maiñ bayāñ
ki ba-har makān-o-ba-har taraf mujhe haq kā jalva dikhā diyā

ba-rañg-e-sham.a chhupe husn-e-jalvagar kyuuñ kar
hazār us ko rakheñ burqa-o-naqāb ke biich

ye kis ne jalva hamāre sar-e-mazār kiyā
ki dil se shor uThā haa.e be-qarār kiyā

nazzāra-e-paiham kā silā mere liye hai
har samt vo ruḳh jalva-numā mere liye hai

kabhī jo parda-e-be-sūratī meñ jalva-farmā the
unhīñ ko ālam-e-sūrat meñ dekhā be-hijābāna

dil arsh-gāh-e-husn hai dil jalva-gāh-e-nāz
ye aap hī kā ghar hai hamārī guzar kahāñ

apnī hī jalvagarī hai ye koī aur nahīñ
ġhaur se dekh agar aañkh meñ bīnā.ī hai