Tags-Justaju

kyā ab kisī kī aarzū yā justujū kareñ
ab ḳhud se hī savāl kareñ guftugū kareñ

us ik jamāl-e-gurezāñ kī justujū meñ 'zahīr'
ḳharāb-o-ḳhvār huī haiñ javāniyāñ kyā kyā

dostī kī justujū hai shahr meñ
ham bhī motī DhūñDte haiñ nahr meñ

vo rā.egāñ bhī agar thī to rā.egāñ na kaho
ki roz-o-shab mire is justujū meñ achchhe the

shauq-e-justujū meñ ham lā-makāñ se guzre haiñ
ḳhud ko āzmāne meñ umr biit jaatī hai

har-nafas ziist kā ho jaa.e agar vaqf-e-talāsh
justujū kahiye use dar-badarī kyuuñ kahiye

haram o dair meñ jā jā ke charāġhāñ karnā
justujū terī hameñ tā-had-e-imkāñ karnā

justujū jis kī thī us ko to na paayā ham ne
is bahāne se magar dekh lī duniyā ham ne

hai rahīn ġham mirī justujū ye hai kaisā gulshan-e-rañg-o-bū
yahāñ kuchh gulo kī talāsh meñ ka.ī ḳhaar maiñ ne chubho liye

ḳhushā vo baaġh mahaktī ho jis meñ bū terī
ḳhushā vo dasht ki ho jis meñ justujū terī

ab tirī justujū huī himmat-e-dil ke hasb-e-zauq
tū ne ye jab se kah diyā ye talab muhāl hai

haa.e us minnat-kash-e-vahm-o-gumāñ kī justujū
zindagī jis ko na paa.e jo na paa.e zindagī

kyā mujhe dasht-navardī kā mazā detā hai
justujū meñ tirī yuuñ ḳhaak uḌānā dil kā

hai talāsh-e-do-jahāñ lekin ḳhabar apnī kise
jīte-jī tak justujū sab kuchh hai aur phir kuchh nahīñ

marham kī justujū meñ phirā huuñ jo duur duur
tan se sivā figār haiñ is ḳhasta-tan ke paañv

kisī ko justujū hai us vajūd-e-pāk ko jaane
tazabzub meñ koī hai us ko maane bhī to kyuuñ maane

kis qadar duur se lauT kar aa.e haiñ yuuñ kaho umr barbād kar aa.e haiñ
thā sarāb apnā sarmāya-e-justujū tum kahāñ jāoge ham kahāñ jā.eñge

DhūñDe se bhī na paa.ī sadiyoñ kī justujū ne
shāmil thī jo tajallī tartīb-e-unsurī meñ

sochtā rahtā hai dil ye sāhil-e-ummīd par
justujū ā.īna-e-madd-o-jazar ho jā.egī

garche hai merī justujū dair o haram kī naqsha-band
merī fuġhāñ se rustaḳhez ka.aba o somnāt meñ