Tags-Kashti

jab apnā dil ḳhud le Duube auroñ pe sahārā kaun kare
kashtī pe bharosā jab na rahā tinkoñ pe bharosā kaun kare

kāġhzī kashtī kā rishta ḳhuub hai 'ālok' se
jhūThe jitne bhī the va.ade aap ke achchhe lage

mañjdhār meñ kashtī kā badalnā nahīñ manzūr
aisī mujhe sāhil kī tamannā nahīñ koī

kaun samjhā.e tirī sar-phirī kashtī ko 'salīm'
ḳhūnīñ dariyā se paḌā hai tirā paalā pāgal

kashtī bhī nahīñ badlī dariyā bhī nahīñ badlā
aur Dūbne vāloñ kā jazba bhī nahīñ badlā

nā-ḳhudā.ī nahīñ karnā hai agar
mujh ko kashtī hī Dubo lene de

tum ret meñ chāho to use khe na sakoge
kashtī jo samundar meñ utarne ke liye hai

vahāñ se 'iram' ham haTā laa.e kashtī
yahāñ ye samajhnā thā sāhil yahī hai

pyāse mirī lahū ke haiñ sab kā.enāt meñ
kashti-e-umr chaltī hai āb-e-furāt meñ

kaTī hai umr kisī ābdoz kashtī meñ
safar tamām huā aur kuchh nahīñ dekhā

sāhil par to sab ke hoñge apne apne log
rah jā.egī kashtī kī har baat samundar meñ

maiñ sāhil se lauT aayā thā kashtī chalne par
pighal chukī thī lekin merī zaat samundar meñ

tirī raah meñ har qadam jaan denā musībat bhī aa.e to sar apne lenā
mohabbat kī kashtī ba-har-hāl khenā rifāqat nahīñ hai to phir aur kyā hai

kāġhaz kī ik kashtī le kar bārish meñ kyuuñ nikle ho
bhūle-bisre bachpan kī yādoñ ke paikar bhīgeñge

tabāh bahr-e-jahāñ meñ thī apnī kashti-e-umr
so TūT-phūT ke baare kināre aan lagī

samundar baukhalāyā phir rahā hai kyuuñ
kināre phir koī kashtī lagī hai kyā

tū ne tūfāñ dekhte hī kyuuñ nigāheñ pher liiñ
nāḳhudā ye ahl-e-kashtī Duub hī jā.eñge kyā

nāḳhudā maujoñ meñ kashtī hai to ho ham ko na dekh
jin ko tūfānoñ ne paalā hai vo ghabrā.eñge kyā

na gayā 'mīr' apnī kashtī se
ek bhī taḳhta paara sāhil tak