Tags-Khafa

tahī-dāmanī se pashemāñ the ham
vo tar-dāmanī par ḳhafā ho gayā

terī dīvār kā saaya na ḳhafā ho mujh se
raah chalte yūñhī kuchh der ko aa baiThā thā

kuchh to ho chāra-e-ġham baat to yak ho jaa.e
tum ḳhafā ho to ajal hī ko maiñ raazī kar luuñ

vo naaz uThāne ke to qaa.el hī nahīñ haiñ
phir ham bhī ḳhafā ho ke biphar jaate haiñ akasr

sab khulā bāġh-e-jahāñ illā ye hairān-o-ḳhafā
jis ko dil samjhe the ham so ġhuncha thā tasvīr kā

yahī kahā thā ki tum sab badalte chehre ho
har ek shaḳhs mujhe phir ḳhafā ḳhafā sā lagā

kyā tujhe ilm nahīñ terī razā kī ḳhātir
maiñ ne kis kis ko zamāne meñ ḳhafā rakkhā hai

mohabbat kī zarā sī baat par itne ḳhafā kyuuñ ho
huā kartī haiñ āḳhir saikḌoñ bāteñ mohabbat meñ

vo nazar mujh se ḳhafā ho jaise
jism se ruuh judā ho jaise

ishq kī rasm yahī hai baaqī
maiñ bhī ik baar ḳhafā ho jā.ūñ

hijr meñ nāla-o-fariyād se baaz aa 'rusvā'
aisī bātoñ se vo bedard ḳhafā hotā hai

naala ruktā hai to sar-garm-e-jafā hotā hai
dard thamtā hai to be-dard ḳhafā hotā hai

ḳhafā nahīñ hai magar is adā ko kyā kahiye
pukārtā huuñ to vo muḌ ke dekhtā bhī nahīñ

jab kaho kyuuñ ho ḳhafā kyā baa.is
kahte haiñ pūchhne kā kyā baa.is

ḳhamosh kis liye baiThe ho chashm-e-tar kyuuñ ho
koī ḳhafā ho kisī se to is qadar kyuuñ ho

ab is pe duur nikal aa.e to ḳhafā kyuuñ ho
ye raah bhī to tumhī ne hameñ dikhā.ī hai

vo ham se ḳhafā haiñ ham un se ḳhafā haiñ
magar baat karne ko jī chāhtā hai

koī zikr ġhair kā ye na thā jise aap sun ke hue ḳhafā
mujhe apne baḳht se hai gila mujhe apne dil se kalām hai

sach batā ishq mujhe saḳht pareshāñ huuñ maiñ
kyuuñ ḳhafā hotā nahīñ dost ḳhatā par merī

jab ḳhafā hotā hai to yuuñ dil ko samjhātā huuñ maiñ
aaj hai nā-mehrbāñ kal mehrbāñ ho jā.egā