Tags-Khoon

ham ne diyā thā ḳhuun bhī us ke liye magar
vo mar gayā ġharīb kā ehsān rah gayā

ḳhūn-e-nāhaq ik musalmāñ kā kiyā
kyā ġhazab o shoḳh-e-be-parvā kiyā

ḳhūn-e-dil meñ hai nihāñ shola-e-sad-rañg-e-bahār
is gulistāñ meñ haiñ is raaz ke mahram kitne

hasrat ke āñsuoñ meñ tamannā kā ḳhuun hai
paanī meñ aag hai ki hai shabnam sharār meñ

saaqī kī ik nazar bhī agar ham pe paḌ ga.ī
tauba kā ḳhuun kar ke raheñge bahār meñ

kisī charāġh se shikva nahīñ kiyā maiñ ne
jalāyā ḳhūn-e-jigar aur raushnī kar lī

rañg kī apnī baat hai varna
āḳhirash ḳhuun bhī to paanī hai

khulā ye ḳhuun kī vahshat hai so maiñ mar to saktā huuñ
mire andar se lekin ḳhū-e-sultānī na jā.egī

sharāb-e-ishq hai donoñ ke jaam meñ lekin
mirī sharāb meñ ḳhūn-e-vafā ziyāda hai

aate aate aa ga.e andāz jiine ke mujhe
ab to 'rahbar' ḳhuun ke aañsū bhī pī letā huuñ maiñ

ḳhuun se tar-ba-tar galī-kūche
dast-e-qātil hai zor par mujh meñ

hayāt sabza-o-gul se tavīl hai us kī
tumhāre ashk mirā ḳhuun kuchh to ḳhaar meñ hai

kyā kyā na ḳhuun thūkā maiñ us galī meñ yaaro
sach jānñā vahāñ to jo fan thā rā.egāñ thā

aa paḌī aisī zarūrat ki lahū pī jā.ūñ
ab mire ḳhuun ke rishte mujhe vāpas kar de

kaun kahtā hai ki jaane de mirī laash ko ghar
bas mire ḳhuun ke kapḌe mujhe vāpas kar de

kisī aur ke liye ho chhupā ke hañsī vo us ne rakhī huī
'zafar' ik mujhī ko hamesha ḳhuun rulānā ho kahīñ yuuñ na ho

maiñ siyah-baḳht jise maar ke apnoñ ne 'jalīl'
ġhair ko dosh diyā ḳhūn-bahā kī ḳhātir

shauq kī baat hai varna suḳhan āsān nahīñ
ek misra.a bhī miyāñ ḳhūn-e-jigar khīñchtā hai

dāman-e-ḳhāk pe ye ḳhuun ke chhīñTe kab tak
inhīñ chhīñToñ ko bahisht-e-gul-o-raihāñ kar deñ

ḳhūn-e-ādam pe koī harf na aane paa.e
jinheñ insāñ nahīñ kahte unheñ insāñ kar deñ