Tags-Khoon

sar-e-rahguzar chhup-chhupā kar guzarnā
ḳhud apne hī jazbāt kā ḳhuun karnā

bevafā se ishq kā anjām hai
ye jo 'ḳhushtar' ḳhūn-e-armāñ ho gayā

dil kā har ek zaḳhm gahrā hai
is se har vaqt ḳhuun ristā hai

kiyā hai ḳhuun jis ne mere dil kā
usī kī shādmānī chāhtā huuñ

qarīb hai yaaro roz-e-mahshar chhupegā kushtoñ kā ḳhuun kyūñkar
jo chup rahegī zabān-e-ḳhanjar lahū pukāregā āstīñ kā

ho gayā ḳhuun hasrat-e-dīdār
de diyā ashk ne shahāb kā rañg

hañso ki surḳh o garm ḳhuun phir safed ho gayā
hañso ki nuqta-e-umīd phir ḳhalā ke dā.ere meñ aaj qaid ho gayā

bahā ḳhūn-e-jigar añkhiyoñ señ pal pal
sajan bin raat ham kuuñ yuuñ bahā.ī

kahīñ manzar asālīb-e-havas ke chār-sū haiñ
kahīñ pe ḳhūn-ālūda fazā hai intihā hai

bas ki thā be-bāl-o-par maiñ dāman-e-sayyād par
ḳhuun bhī uḌ kar dam-e-bismil na merā paḌ gayā

reg-e-sahrā hai na qadmoñ ke nishāñ baaqī haiñ
ḳhushk ashkoñ kī nadī ḳhuun kī Thahrī huī dhaar

rachī huī hai fazāoñ meñ kis ke ḳhuun kī bū
ye kaisā jashn-e-bahārāñ mire dayār meñ hai

'sajjād' koī hiila ki lau de uThe ye dil
dam ghuT rahā hai ḳhuun ke is injimād se

mirā nāma-e-shauq talvoñ tale
na maliye ye ḳhūn-e-shahīdāñ nahīñ

barf-bārī hai mah o saal kī sar par lekin
ḳhuun meñ garmi-e-pahlu-e-butāñ hai ab tak

tumhārī yaad ne shab-ḳhūn mārnā hai to kyā
dil-o-dimāġh se pahra haTā diyā jaa.e

ik lau thī mire ḳhuun meñ tahlīl to ye thī
ik barq sī rau thī mirī qindīl to ye thī

diyat is qātil-e-be-rahm se kyā lījiyegā
apnī hī āñkhoñ se ab ḳhuun bahā lījiyegā

kaam shabnam kā liyā dīda-e-tar se apne
maiñ ne sīñchā hai use ḳhūn-e-jigar se apne

varaq varaq pe sajā.ī hai ḳhuun kī tahrīr
ki sher sher nayā intiḳhāb le ke chale