Tags-Khoon

zaḳhmī huā hai naam ko dar-parda husn bhī
yūsuf kā ḳhūn-e-gurg se hai pairahan ḳharāb

qatra-e-surḳh meñ jab ḳhuun kī tāsīr nahīñ
kyā hai phir jism meñ tezāb se miltā-jultā

kyā din the ki ḳhuun thā jigar meñ
ro uThte the baiTh dopahar raat

ashk barsā.e kabhī ḳhuun bahāyā ham ne
ġham kā dariyā kisī mausam meñ utarne na diyā

ḳhūn-e-siyā.ush ik din dikhlā.egā ḳharābī
is zulm kā evaz ai afrāsiyāb hogā

'shamīm' ḳhūn-e-jigar se ubhāriye lekin
har ek naqsh meñ koī kamī sī rahtī hai

ab vahāñ phūTeñge phir se lāla-o-gul dekhnā
ho rahā hai ḳhuun kā chhiḌkāv arz-e-pāk par

falak kā andāz kah rahā hai hamāre armāñ kā ḳhuun hogā
abhī to āġhāz-e-shab hai āḳhir sitāre kyuuñ jhilmilā rahe haiñ

dil-o-jigar ḳhuun ho chuke haiñ hamāre lab par magar hañsī hai
ham apne afsāna-e-vafā ko kuchh aur rañgīñ banā rahe haiñ

karne de mere ḳhuun ko ārām ḳhaak meñ
ai shor-e-hashr us ko abhī mat jagā sarak

mayyat se merī guzre hai jis dam vo ba.ad-e-qatl
lāsha kahe hai ḳhuun se dāman bachā sarak

ḳhuun Tapkā hai merī āñkhoñ se
ik masīhā kī mehrbānī hai

aatī hai o qais lailā dasht meñ
ḳhūn-e-pā se jild ab pur-ḳhār rañg

kal mātam be-qīmat hogā aaj un kī tauqīr karo
dekho ḳhūn-e-jigar se kyā kyā likhte haiñ afsāne log

hameñ sairāb na.ī nasl ko karnā hai so ham
ḳhuun meñ apne nahāne ke liye nikle haiñ

rahguzar meñ tirī qālīn bichhāne vaale
ḳhuun kā farsh bichhāne ke liye nikle haiñ

hamīñ ne ḳhuun se sīñchā hai ġhuncha-o-gul ko
bahār kahte haiñ jis ko vo ye bahār nahīñ

na ḳhūn-e-shab thā na shab-ḳhūñ ye maan leñ lekin
shafaq tulū-e-sahar ko lahū lahū kyā thī

sahl ho jā.egī mushkil zabt soz o saaz kī
ḳhūn-e-dil ko aañkh se jis roz bahnā aa gayā

kyūñki ham ḳhuun na ro.eñ shab-e-īd
yaar mashġhūl-e-hinā-bandī hai