Tags-Khuda

mazā ishq-e-haqīqī meñ na kuchh ishq-e-majāzī meñ
ḳhudā se ġham duī kā hai sanam se rañj furqat kā

shahīdān-e-ḳhudā mujh ko bhī thoḌī se jagah denā
na ho barbād merī ḳhaak sadqa apnī turbat kā

mirī zabāñ pe na.e zā.iqoñ ke phal likh de
mire ḳhudā tū mire naam ik ġhazal likh de

sūraj koī na koī sitārā tulūa ho
tanhā agar ḳhudā hai to tanhā tulūa ho

jo ḳhushāmad kare ḳhalq us se sadā raazī hai
sach to ye hai ki ḳhushāmad se ḳhudā raazī hai

'dāġh' ko kaun dene vaalā thā
jo diyā ai ḳhudā diyā tū ne

gila nahīñ mire hoñToñ pe tañg-dastī kā
ḳhudā kā shukr mirā dil abhī tavañgar hai

adū the maalī aur sayyād gulchīñ ne qayāmat kī
ḳhudā la.anat kare tīnoñ pe chhūTā gulistāñ ham se

ulfat ne unhīñ kī haq kī taraf pherā mire dil ko shukr-e-ḳhudā
tāmīr kareñ masjid koī kyūñkar na butoñ ke naam se ham

apnī kashtī kā hai ḳhudā-hāfiz
pīchhe tūfāñ hai sāmne girdāb

vo hurriyat kā parastār qaum kā rahbar
ḳhudā ne qaum ko aisā atā kiyā jauhar

itnī afsurda āvāz mere ḳhudā
merī pahlī samā.at pe likkhī ga.ī

hue ham jab se paidā apne dīvāne hue hote
ḳhudā ko ham pahuñchte ḳhud se begāne hue hote

haañ vo nahīñ ḳhudā-parast jaao vo bevafā sahī
jis ko ho diin o dil aziiz us kī galī meñ jaa.e kyuuñ

aisā lagtā hai mohabbat kā ḳhudā hai us meñ
dekhtī huuñ jo gagan tum ko duā detī huuñ

farishte hashr meñ pūchheñge pāk-bāzoñ se
gunāh kyuuñ na kiye kyā ḳhudā ġhafūr na thā

na kar ḳhudā ke liye baar baar zikr-e-bahisht
ham āsmāñ kā mukarrar fareb kyuuñ khā.eñ

talāsh-e-husn kahāñ le chalī ḳhudā jaane
umañg thī ki faqat zindagī ko apnā.eñ

laboñ pe narm tabassum rachā ke dhul jaa.eñ
ḳhudā kare mire aañsū kisī ke kaam aa.eñ

maiñ jahāñ thā vahīñ rah gayā ma.azarat
ai zamīñ ma.azarat ai ḳhudā ma.azarat