Tags-Khuda

karo shukr hai ye ināyat ḳhudā kī
balāoñ meñ aksar giraftār rahnā

phir koī dam meñ aah ḳhudā jaane ye falak
le jaave kis taraf ko tujhe aur kidhar mujhe

ḳhudā ke vāste itnā to jhuuT mat bolo
kahīñ na TuuT paḌe āsmān koThe par

na thā kuchh to ḳhudā thā kuchh na hotā to ḳhudā hotā
Duboyā mujh ko hone ne na hotā maiñ to kyā hotā

ab jhelnā paḌegā azāb-e-gunāh-e-ishq
us but-numā ḳhudā ke irāde palaT ga.e

usī ke jhuuT se girdāb meñ us kā safīna hai
magar ulTā vo apne nā-ḳhudā se jhuuT bolegī

vo ik ik jhuuT jhuTlāne ko sau sau jhuuT bolegī
vo ḳhud se jhuuT bolegī ḳhudā se jhuuT bolegī

ab ḳhudā jaane tujhe bhī hai ta.alluq ki nahīñ
log lete haiñ mirā naam tire naam ke ba.ad

sabhī gup-chup takā karnā but-e-be-his banā rahnā
ḳhudā tujh hī sā kyā sach-much mire ma.abūd hotā hai

ham fāqa-mast rizq-e-muqaddar pe shaad haiñ
bheje ḳhudā ta.aam ke ḳhvāñ aur kī taraf

ghar dil meñ tū hamāre ḳhudā ke liye na le
ai ḳhānumāñ-ḳharāb makāñ aur kī taraf

phir jabr-o-sitam ke saa.e meñ kuchh log ḳhudā ban baiThe haiñ
muusā hī nahīñ haiñ ab varna fir.aun bhī hai aur tuur bhī hai

bachā kar kyuuñ Duboyā nā-ḳhudā ne is safīne ko
inhīñ maujoñ meñ tūfāñ thā inhīñ maujoñ meñ sāhil thā

jins-e-nāyāb-e-mohabbat kī ḳhudā ḳhair kare
bul-havas us ke ḳharīdār nazar aate haiñ

tauba tauba hai yahī ishq kī bātil nazarī
sañg but-ḳhāne meñ aate hī ḳhudā hotā hai

ḳhudā kā shukr hai nashsha utar gayā merā
ki maiñ subū meñ samundar ulaTne vaalā thā

maiñ apnī zaat kī ham-sā.egī se Dartā huuñ
mire qarīb ḳhudā ke liye na lā mujh ko

vo aa rahe haiñ zamāne ki tum bhī dekhoge
ḳhudā ke haath se insān ko badalte hue

ḳhudā kare na thakeñ hashr tak junūñ ke paañv
abhī manāzil-e-rañj-o-mehan kuchh aur bhī haiñ

shaiḳh kartā to hai masjid meñ ḳhudā ko sajde
us ke sajdoñ meñ asar ho ye zarūrī to nahīñ