Tags-Khuda

hue haiñ TukḌe TukḌe ab dil-e-bismil ke ai 'kaifī'
ki hogā kyā ḳhudā jaane sitāro tum to so jaao

ye maiñ ne maanā judā.ī mirā muqaddar hai
magar ye baat na muñh se kaho ḳhudā ke liye

hamāre jaam meñ mai bhī hai ḳhūn-e-dil bhī hai
ye dekhnā hai ḳhudā vaale kyā harām kareñ

ḳhudā nibāhe ye āshnā.ī hameñ ye ulfat ke laag bhaa.ī
kisī din us par jo dhuup aa.ī yahāñ qalaq se buḳhār aayā

kaho ye saaqī se aa ḳhudārā kare na kashtī-e-mai kinārā
ḳhudā kī rahmat ne josh maarā barastā abr-e-bahār aayā

kāshif-e-zāt-e-ḳhudā thā sar-basar
ab nahīñ hai jo rahā hai aadmī

ḳhudā vo vaqt na laa.e ki sogvār ho tū
sakūñ kī niiñd tujhe bhī harām ho jaa.e

kaun ruḳhsat huā ḳhudā.ī se
har taraf ye ḳhudā ḳhudā kyā hai

jab koī taaza musībat TūTtī hai ai 'hafīz'
ek aadat hai ḳhudā ko yaad kar letā huuñ maiñ

farishtoñ ne pukārā ai 'jamīla' jald hāzir ho
ḳhudā ke rū-ba-rū aa kar saf-e-ahl-e-safā Thahrī

ḳhudā banā ke hameñ pūjne lagā thā vo
bahut ḳharāb kiyā hai hamārā diin us ne

haañ ḳhudā-lagtī zarā kah de tū ai husn-e-sanam
āshiqī auroñ kī achchhī yā ki hairānī mirī

vo harf-e-rāz ki mujh ko sikhā gayā hai junūñ
ḳhudā mujhe nafas-e-jabra.īl de to kahūñ

maiñ ik thakā huā insān aur kyā kartā
tarah tarah ke tasavvur ḳhudā se bāñdh liye

'asad' hai naza.a meñ chal bevafā barā-e-ḳhudā
maqām-e-tark-e-hijāb o vidā-e-tamkīñ hai

sarāpā aarzū hone ne banda kar diyā ham ko
vagarna ham ḳhudā the gar dil-e-be-mudda.ā hote

jise dekho vahī badmast hī maġhrūr hai hamdam
koī banda nahīñ duniyā meñ kis kis ko ḳhudā samjho

ye kyā andāz hai itnā gurez ahl-e-tamannā se
ḳhudā taufīq de to ahl-e-dil kā mudda.ā samjho

sunte haiñ jo bahisht kī tārīf sab durust
lekin ḳhudā kare vo tirā jalva-gāh ho

ḳhudā merī anā mahfūz rakkhe
maiñ do roTī kamānā chāhtā huuñ