Tags-Khuda

ḳhudā gar hameñ ik parinda banātā
jahāñ meñ ham ik āshiyāna banāte

is husn-e-be-karāñ ko ḳhudā āgahī bhī de
dariyā diyā hai is ko to dariyā-dilī bhī de

ḳhālī bhī to kar ḳhāna-e-dil duniyā se
is ghar meñ mirī jaan ḳhudā aa.egā

tum ko ḳhudā ne diyā saarī ḳhudā.ī kā husn
mujh ko atā kar diyā saarī ḳhudā.ī kā ishq

ye duā ka.aba meñ karte haiñ ki us but se milā
tere darvāza par aa kar ai ḳhudā baiThe haiñ ham

chaman ujāḌne vaalo tumheñ ḳhudā samjhe
tumheñ na aa.ī hayā phuul to hamāre ga.e

vo ga.e jab se aisā lagtā hai
chhoTā moTā ḳhudā gayā koī

yahī bas 'akbar' kī iltijā hai janāb-e-bārī meñ ye duā hai
ulūm-o-hikmat kā dars un ko professor deñ samajh ḳhudā de

nikalte haiñ kar ke ġhol-bandī ba-nām-e-tahzīb o dard-mandī
ye kah ke lete haiñ sab se chande hameñ jo tum do tumheñ ḳhudā de

ḳhudā alī-gaḌh kī madrase ko tamām amrāz se shifā de
bhare hue haiñ ra.īs-zāde amīr-zāde sharīf-zāde

ḳhudā ke baare meñ ik din zarūr socheñge
abhī to ḳhud se ta.alluq bhī ustuvār nahīñ

tum apnī hālat-e-ġhurbat kā ġham manāte ho
ḳhudā kā shukr karo mujh se be-dayār nahīñ

shān-e-ḳhudā ayaañ hai har but se mai-kade meñ
ka.abe meñ tum ne jā kar ai 'shād' kyā banāyā

ruuh ko karb se rihā.ī de
mere soz-e-darūñ ḳhudā-hāfiz

ye gumāñ tak na thā mujhe ik din
tujh se kahnā hai yuuñ ḳhudā-hāfiz

tujh ko mushkil hai to judā.ī kī
ibtidā maiñ karūñ ḳhudā-hāfiz

mujh ko izn-e-mafāriqat hai dost
phir na shāyad milūñ ḳhudā-hāfiz

ruḳhsatī apnī zaat se chāhūñ
aaj ḳhud se kahūñ ḳhudā-hāfiz

ai ḳhirad aur junūñ ḳhudā-hāfiz
ai dil-e-be-sukūñ ḳhudā-hāfiz

āsmānoñ meñ kise DhūñD rahī huuñ 'sīmā'
vo to baiThā hai mire dil meñ ḳhudā hone ko