Tags-Khuda

maiñ ne māñgī thī ye masjidoñ meñ duā maiñ jise chāhtā huuñ vo mujh ko mile
jo mirā farz thā maiñ ne puurā kiyā ab ḳhudā bhuul jaa.e to maiñ kyā karūñ

zāhir hai haq kā jalva gar aañkh ho to dekhe
'markaz' ḳhudā ko aalam bhūle pukārte haiñ

ajab sī kashmakash meñ huuñ zavāl-e-ishq hai lāzim
sanam kuchh aur kahtā hai ḳhudā kuchh aur kahtā hai

mire gunāh kī mujh ko sazā nahīñ detā
mirā ḳhudā kahīñ nārāz to nahīñ mujh se

is parde meñ to kitne girebān chaak haiñ
vo be-hijāb hoñ to ḳhudā jaane kyā na ho

Daro na tum ki na sun le kahīñ ḳhudā merī
ki rū-shanās-e-ijābat nahīñ duā merī

ḳhudā ne zahr kī tāsīr baḳhsh dī 'fānī'
taras ga.ī thī asar ko bahut duā merī

umañDtī yādoñ ke āshob se meñ vāqif huuñ
ḳhudā kare kisī sūrat vo bhuul jaa.e mujhe

rahte hue qarīb judā ho ga.e ho tum
banda-navāz jaise ḳhudā ho ga.e ho tum

kisī ko māñge binā mile sab kisī kī jholī rahe hai ḳhālī
ki is ke pīchhe ḳhudā kī manshā hai kyā kisī ko patā nahīñ hai

guzar rahī zindagī ye kaisī jo pūchhte ho to kyā batā.ūñ
ḳhudā se mujh ko gila nahīñ hai magar jo chāhā milā nahīñ hai

'qamar' is se ham ko ġharaz hī kyā hai sabhī se us kā mo.āmla
jo ḳhudā kaheñ vo ḳhudā kaheñ jo sanam kaheñ vo sanam kaheñ

donoñ hī kāmyāb hue haiñ talāsh maiñ
zāt-e-ḳhudā milī mujhe zāt-e-ḳhudā ko maiñ

kyuuñ us kī justujū kā ho saudā mujhe 'ratan'
mujh se agar judā ho to DhūñDūñ ḳhudā ko maiñ

ḳhudā rakkhe dil-e-māyūs meñ ummīd baaqī hai
yahī gul hai jo bū detā hai pāmāl-e-ḳhizāñ ho kar

ḳhudā jaane ye ab kyā ho gayā ham bad-nasīboñ ko
ki tere ġham kī lazzat bhī na raas aa.ī ka.ī din se

mirī qasam hai tumheñ rahravān-e-mulk-e-adam
ḳhudā ke vāste tum bhūlnā na jā ke mujhe

ḳhudā kī shaan hai maiñ jin ko dost rakhtā thā
vo dekhte bhī nahīñ ab nazar uThā ke mujhe

na apne zabt ko rusvā karo satā ke mujhe
ḳhudā ke vāste dekho na muskurā ke mujhe

muskurāte raho ḳhudā ke liye
phuul jhaḌte haiñ muskurāne se