Tags-Khuda

ḳhudā ke vāste ab chhoḌ jism-e-ḳhākī ko
aziyyateñ bahut o jān-e-zār dekh chuke

ham ne to be-shumār bahāne banā.e haiñ
kahtā hai dil ki but bhī ḳhudā ne banā.e haiñ

be-shak hai nā-ḳhudā kī mohabbat bhī un ke saath
'anjum' ḳhudā kā naam jo lete haiñ pyaar se

ye kah kar vo chalā sū-e-shahādat
ḳhudā ke paas kyā bīmār jaanā

tirī talab thī zamāna tujhe zamāna milā
mirī talab thī ḳhudā so mirā ḳhudā hai bas

agar yahī hai talavvun un kā ḳhudā hī hai va.ada ho jo puurā
kahā thā kal aaj vasl hogā vo aaj phir kal pe Tālte haiñ

na qahr raftār-e-nāz Dhaa.e lachak na vaqt-e-ḳhirām aa.e
ḳhudā hī nāzuk kamar bachā.e ki pā.eñche vo sambhālte haiñ

qadam uThte the kahāñ sū-e-haram apne 'adīm'
aaj mushkil nazar aa.ī to ḳhudā yaad aayā

kis havāle se mujhe kis kā patā yaad aayā
husn-e-kāfir ko jo dekhā to ḳhudā yaad aayā

ai ḳhudā duniyā pe ab qabza butoñ kā chāhiye
ek ghar tere liye in sab ne ḳhālī kar diyā

ḳhudā samajh le lagāne bujhāne vāloñ ko
ye ḳhvāh-maḳhvāh yahāñ meñ vahāñ meñ rahte haiñ

bahut se logoñ meñ paañv ho kar bhī chalne-phirne kā dam nahīñ hai
mire ḳhudā kā karam hai mujh par maiñ apne pairoñ se chal rahā huuñ

jo hai vo kuchh bhī nahīñ jo nahīñ vo sab kuchh hai
mire ḳhudā ye tamannā kī sāhirī kyā hai

hirās hai ye azal kā ki zindagī kyā hai
ḳhudā nahīñ hai to logo umiid bhī kyā hai

us haram kī zeb-o-zīnat ko ḳhudā rakkhe magar
mujrimān-e-ahd-o-paimān-e-kalīsā ham bhī haiñ

ab tujh se jo rabt hai to itnā
terā hī ḳhudā mirā ḳhudā hai

ye jo insāñ ḳhudā kā hai shahkār
us kī qismat pe hai ḳhudā kī maar

din to shikam kī aag bujhāne meñ jaa.e hai
shukr-e-ḳhudā ki kaTtī hai dānishvaroñ meñ raat

ajiib haiñ mirī bāteñ ajiib hai ehsās
tumheñ ḳhudā na kare ye gumāñ guzarte hoñ!

ajiib haiñ mirī bāteñ ajiib hai ehsās
tumheñ ḳhudā na kare ye gumāñ guzarte hoñ