Tags-Khuda

tarāsh aur bhī apne tasavvur-e-rab ko
tire ḳhudā se to behtar mirā sanam hai abhī

ḳhudā aur nāḳhudā mil kar Dubo deñ ye to mumkin hai
merī vaj.h-e-tabāhī sirf tūfāñ ho nahīñ saktā

in butoñ kī sūrat-e-zebā ko 'asġhar' kyā kahūñ
par ḳhudā ne vaa.e nākāmī musalmāñ kar diyā

hai mahv-e-tamannā dil-e-āzurda ki dekhe
pindār-e-mohabbat meñ hai andāz-e-ḳhudā kyā

chal aa bashar ko kisī vasvase meñ jhoñk deñ aur
usī se ḳhauf banā.eñ ḳhudā kashīd kareñ

jahān vaale sabhī thak ga.e falak takte
ḳhudā kabhī tū bhī to dekhā kar jahāñ kī taraf

yā ḳhudā kuchh to dard kam kar de
yā judā mujh se merā ġham kar de

haañ kaif-e-be-ḳhudī kī vo saa.at bhī yaad hai
mahsūs kar rahā thā ḳhudā ho gayā huuñ maiñ

gar ehtirām-e-rasm-e-vafā hai to ai ḳhudā
ye ehtirām-e-rasm-e-kohan mujh se chhīn le

ai ḳhudā hai hasīñ tirī duniyā
par mirā jī uchaT gayā afsos

dukh nahīñ ye jahāñ muḳhālif hai
saath apne nahīñ ḳhudā afsos

hamīñ pe sajte haiñ yaaro sharāb bhī ġham bhī
ḳhudā ke vāste ab koī mashvara bhī na de

mire hisār se bāhar bhī vo nahīñ rahtā
mire qarīb bhī aatā nahīñ ḳhudā kī tarah

ḳhudā ke vāste kar tū hī saaqī us kī dildārī
ki mere haath se mai, yār-e-be-parvā nahīñ piitā

natīja sun ke ka.ī log bad-havās hue
ḳhudā kā shukr hai ham imtihāñ meñ paas hue

vahāñ tumhāre bhī bachpanoñ kī hasīn yādeñ haiñ dafn yaaro
ḳhudā gavāh hai vatan meñ tum ko tumhāre qasbe bulā rahe haiñ

mausam-e-nāra-e-bulbul bhī kabhī aa.egā
is se māyūs na ho ḳhalq-e-ḳhudā bolegī

mohabbat but-kade meñ chal ke us kā faisla kar de
ḳhudā merā ḳhudā hai yā ye mūrat hai ḳhudā merī

ibādat ḳhudā kī ba-ummīd-e-hūr
magar tujh ko zāhid hayā kuchh nahīñ

hai ḳhudā sāmne mere maujūd
aa ga.ī bandagī bulandī par