Tags-Khuda

ḳhudā ke sāmne jo sar yaqīñ ke saath jhuk jaa.e
kisī tāqat ke aage phir kabhī vo ḳham nahīñ hotā

ḳhudā jaane duā thī yā shikāyat lab pe bismil ke
nazar sū-e-falak thī haath meñ dāmān-e-qātil thā

vahī hai fazl-e-ḳhudā se ab tak taraqqi-e-kār-e-husn o ulfat
na vo haiñ mashq-e-sitam meñ qāsir na ḳhūn-e-dil kī yahāñ kamī hai

maiñ ḳhudā to nahīñ jo us ko dikhā.ī na diyā
DhūñDhtā merā pujārī kabhī kho kar mujh ko

ḳhudā deve agar qudrat mujhe to zid hai zāhid kī
jahāñ tak masjideñ haiñ maiñ banā.ūñ toḌ but-ḳhāna

ai bār-e-ḳhudā ye shor-o-ġhauġhā kyā hai
kyā chiiz talab hai aur tamannā kyā hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

jānvar aadmī farishta ḳhudā
aadmī kī haiñ saikaḌoñ qismeñ

maiñ insāñ thā ḳhudā hone se pahle
anal-haq kī anā hone se pahle

be-ḳhudā hone ke Dar meñ be-sabab rotā rahā
dil ke chauthe āsmāñ par kaun shab rotā rahā

chaman meñ rakh to rahā huuñ binā nasheman kī
ḳhudā kare ki zamāna bhī sāzgār rahe

abhī tū shā.ir nahīñ hai 'rāv'
ḳhudā vo din bhī atā karegā

ḳhudā kā shukr ki aahaT se ḳhvāb TuuT gayā
maiñ apne ishq meñ nākām hone vaalā thā

jis tarah dil mirā taḌaptā hai
yuuñ na taḌpe ḳhudā kare koī

shauq-e-dīdār dil meñ hai 'darshan'
aa bhī jaa.e ḳhudā kare koī

hamesha bāda-ḳhvāroñ par ḳhudā ko mehrbāñ dekhā
jahāñ baiThe ghaTā uTThī jahāñ pahuñche bahār aa.ī

jalva-e-husn-e-butāñ se hai agar dil kā ziyāñ
ai ḳhudā-vand mire dil kā ziyāñ aur sahī

naav kyuuñ us ke hāthoñ sauñpī thī
nāḳhudā to ḳhudā nahīñ hotā

ham kyuuñ itā.at in kī kareñ fā.eda 'qalaq'
kyā ye butān-e-dahr ḳhudā se milā.eñge

jalva-e-husn-e-ḳhudā-dād dikhā kar dilbar
misl-e-ā.īna kiyā aap ne hairāñ mujh ko