Tags-Khuda

ḳhalq be-parvā ḳhudā bandoñ se tañg aayā huā
maiñ akelā phir rahā huuñ hashr ke maidān meñ

ḳhudā kā shukr adā kiije ḳhush-nasībī par
'hafīz' aap dil-e-ġham-shanās rakhte haiñ

tum zulm kahāñ tak tah-e-aflāk karoge
ye baat na bhūlo ki hamārā bhī ḳhudā hai

ḳhudā kare na kabhī lazzat-e-safar kam ho
tamām-umr hameñ terī justujū hī rahe

rañj-e-ġham khāne ko ḳhudā ne diyā
kyā nahīñ mujh gadā kī jholī meñ

ḳhudā badal na sakā aadmī ko aaj bhī 'hosh'
aur ab tak aadmī ne saikḌoñ ḳhudā badle

tire dil kī bhī na kalī khile tire haath TūTeñ ḳhudā kare
jise toḌe letā hai bāġhbāñ yahī phuul jān-e-bahār hai

ye vafā māñge hai tum se na jafā māñge hai
merī māsūm jabīñ ek ḳhudā māñge hai

kamāl-e-tālib-dūñ-e-dūñ hai pīr-e-haram
ḳhudā ke ghar meñ hai lekin ḳhudā se bāhar hai

qasam ḳhudā kī ye vāraftagī na thī mujh meñ
kisī ke ishq-e-salīqa-shi.ār se pahle

ḳhudā-parast hue ham na but-parast hue
kisī taraf na jhukā sar kuchh aise mast hue

kabhī kabhī mujhe ḳhud par yaqīñ nahīñ hotā
kabhī kabhī maiñ ḳhudā ko pukār letī huuñ

ḳhayāl aayā hameñ bhī ḳhudā kī rahmat kā
sunā.ī jab bhī paḌī hai azaan pinjre meñ

bastī kā chashm-dīd akelā gavāh huuñ
kal mere ās-pās ḳhudā thā so ḳhvāb thā

ḳhudā mahfūz rakkhe intishār-e-rahnumā.ī se
isī manzil pe aa ke aadmī dīvāna hotā hai

ḳhudā se bhī kab koī furqat kaTī hai
shab-e-hijr shab se bhī pahle banī hai

ḳhudā.ī ko bhī ham na ḳhush rakh sake
ḳhudā bhī ḳhafā kā ḳhafā rah gayā

ġhair mumkin hai daḳhl-e-ġhair is meñ
dil ko jab ḳhāna-e-ḳhudā jaanā

sar jhukāne kī us ne adā siikh lī
jo hamesha razā-e-ḳhudā se chalā

agar vo apne bandoñ par dar-e-rahmat na vā kartā
to ye bande ḳhudā ke phir ḳhudā jaane kidhar jaate