Tags-Khuda

tum aa ga.e ho ḳhudā kā subūt hai ye bhī
qasam ḳhudā kī abhī maiñ ne tum ko sochā thā

jise ḳhamīda saroñ se mile qad-o-qāmat
use kisī na kisī din ḳhudā to honā thā

ai halqa-e-darveshāñ vo mard-e-ḳhudā kaisā
ho jis ke garebāñ meñ hañgāma-e-rustā-ḳhez

ḳhudā kī bhī nahīñ sunte haiñ ye but
bhalā maiñ kyā huuñ merī iltijā kyā

rahne de apnī bandagī zāhid
be-mohabbat ḳhudā nahīñ miltā

ye ḳhudā kī shaan to dekhiye ki ḳhudā kā naam hī rah gayā
mujhe taaza yād-e-butāñ huī jo haram se shor-e-azāñ uThā

kashtiyāñ sab kī kināre pe pahuñch jaatī haiñ
nāḳhudā jin kā nahīñ un kā ḳhudā hotā hai

hairāñ zamīñ ke nuur se hai charḳh-e-lājvard
mānind-e-kahrubā hai ruḳh-e-āftāb-e-zard

ik adnā sā parda hai ik adnā sā tafāvut
maḳhlūq meñ ma.abūd meñ bande meñ ḳhudā meñ

hairāñ haiñ apne apne jo dekhā so kaam meñ
kyā nāḳhudā-shanās yahāñ kyā ḳhudā-shanās

mizha par hai pārā-e-dil thañbā vo masal huī hai ab ai ḳhudā
ki daraḳht se jo kabhī girā to vo aTkā un ke hī jhaaḌ meñ

bandagī ham ko to aa.ī ki na aa.ī lekin
husn yuuñ ruuTh gayā hai ki ḳhudā ho jaise

ab na vo 'bismil' aur na tū ab na vo dil na aarzū
ab to ḳhudā ke vāste yaad use na aa.e jā

tum ḳhudā.ī kā da.avā karte ho
tum ḳhudā ho to phir ḳhudā kyā hai

maiñ sadqe tire haq ke pyāre kanhaiyā
zamīñ par ḳhudā ke utāre kanhaiyā

'vaqār-hilm' alī vāloñ se ḳhudā kī qasam
pul-sirāt ke raste bhī raah rakhte haiñ

ai ḳhudā āsūdgī kā ek lamha mere naam
umr guzrī hai mirī ḳhadshāt kī dahlīz par

bazm-e-dushman hai ḳhudā ke liye ārām se baiTh
baar baar ai dil-e-nādāñ tujhe kyā hotā hai

kisī ke naam pe nanhe diye jalāte hue
ḳhudā ko bhuul ga.e nekiyāñ kamāte hue

ab to hai ishq-e-butāñ meñ zindagānī kā maza
jab ḳhudā kā sāmnā hogā to dekhā jā.egā