Tags-Khuda

chalo vo kufr ke ghar se salāmat aa ga.e lekin
ḳhudā kī mumlikat meñ soḳhta-jānoñ pe kyā guzrī

dil liyā hai to ḳhudā ke liye kah do sāhab
muskurāte ho tumhīñ par mirā shak jaatā hai

yahī sahī tirī marzī samajh na paa.e ham
ḳhudā gavāh ki mub.ham the kuchh ishāre bhī

ḳhudā darāz kare umr charḳh-e-nīlī kī
ye bekasoñ ke mazāroñ kā shāmiyāna hai

dekhā thā ḳhud ko maiñ ne tujhe dekhne ke ba.ad
ye to gunāh mujh se ḳhudā kī qasam huā

aise bohtān lagā.e ki ḳhudā yaad aayā
but ne ghabrā ke kahā mujh se ki qur.ān uThā

ġhash koī kisī ko hai saktā hai nūr-e-ḳhudā terā jalva
ho daḳhl tire ghar meñ kis kā yaañ hājib-e-dar hai partav-e-ruḳh

ḳhudā se hukm-e-tansīḳh-e-ajal māñgeñge mahshar meñ
magar 'sīmāb' ye to qissa-e-mā-bād-e-hastī hai

maut ne aaj ḳhud-kushī kar lī
ziist par kyā banī ḳhudā jaane

merā hāfiz aap ḳhudā
phir kis kī auqāt lage

tujh ko paa.e to 'vahīd' apne ḳhudā ko pā le
kāvish-e-ma.arfat-e-zāt mukammal ho jaa.e

ḳhudā mahfūz rakhte āfatoñ se
ka.ī din se tabī.at shādmāñ hai

bas apne bām-o-dar se ham nā āshnā rahe sadā
koī to rāhbar mile koī to ab ḳhudā mile

ḳhudā huuñ maiñ gumbad se laTkā huā huuñ
maiñ bhagvān mandir ke bāhar paḌā huuñ

ḳhudā hī phir bharosa hai ḳhudā hai nāḳhudā merā
vagarna maiñ bhañvar meñ huuñ mujhe sāhil se kyā nisbat

ḳhudā ke fazl se ham haq pe haiñ bātil se kyā nisbat
hameñ tum se ta.alluq hai mah-e-kāmil se kyā nisbat

yuuñ sadā detā hai akasr koī mujh meñ se mujhe
tujh ko ḳhush rakkhe ḳhudā yūñhī magar maiñ bhī to huuñ

zamīñ kā dam nikaltā jā rahā hai
ḳhudā kā kaam chaltā jā rahā hai

mujh ko aayā hī nahīñ jis kā yaqīñ aaj talak
vo ḳhudā kitnā baḌā hai mire andāze se

lab tak jo na aayā thā vahī harf-e-rasā thā
jis ko na maiñ samjhā thā vahī merā ḳhudā thā