Tags-Khwab

din ko safar kuchh aur bhī āsān ho gayā
rātoñ ko sabz ḳhvāb ye kis ne dikhā diye

tūfāñ kā ruup dhaar liyā tez saañs ne
itnā ki ḳhvāb-gāh ke parde hilā diye

dhaḌaktī qurbatoñ ke ḳhvāb se jaage to jaanā
zarā se vasl ne kitnā akelā kar diyā hai

aayā hai yaar fātiha paḌhne ko qabr par
bedār baḳht-e-ḳhufta hai ḳhvāb-e-girāñ meñ ham

hai kis kā intizār ki ḳhvāb-e-adam se bhī
har baar chauñk paḌte haiñ āvāz-e-pā ke saath

mire liye to ḳhvāb ek chashma-e-hayāt thā
kisī ko ḳhvāb ḳhvāb thā bikhar gayā to kyā huā

fasīl-e-sarhad-e-māzī dhaḌakne lagtī hai
jo ḳhvāb niiñd kā dar khaTkhaTāne lagte haiñ

hai dekhne kī chiiz bhī kuchh dekhtā hai kyā
sair-e-jahāñ hai ḳhvāb-e-pareshān-e-zindagī

vā.iz-e-shahr ke na.aroñ se to kyā khultī aañkh
ḳhud mire ḳhvāb kī haibat ne jagāyā hai mujhe

tumhārī aañkh se maiñ apne ḳhvāb dekhtā huuñ
yahī to merī sazā hai samajhtā kyuuñ nahīñ maiñ

phisaltī ret pe fihrist-e-ḳhvāb likhnī hai
ye imtihān kaḌā hai samajhtā kyuuñ nahīñ maiñ

khulīñ jo niiñd se āñhkeñ hamārī yaañ 'āzar'
guzar chukā thā zamāna bhī ḳhvāb mausam kā

aa.ī thī javānī ham par bhī ham ne bhī bahāreñ dekhī haiñ
is daur se ham bhī guzre haiñ ik ḳhvāb-e-pareshāñ hotā hai

phir vahī shaḳhs mire ḳhvāb meñ aayā hogā
niiñd meñ us ne hī āñkhoñ ko rulāyā hogā

tishnagī ne sarāb hī likkhā
ḳhvāb dekhā thā ḳhvāb hī likkhā

paane kā use ḳhvāb jo dekhā hai hamesha
vo ḳhvāb hī bas ḳhvāb kī ta.abīr meñ likh de

kabhī vo tasvīr ban ke dekhe kabhī vo tahrīr ban ke bole
vo pal meñ gum-sum vo pal meñ hairāñ kisī musavvir ke ḳhvāb jaisā

aañkh meñ ḳhvāb kī kircheñ thiiñ so tū ne chun liiñ
par jo ik qatra-e-ḳhūñ thā so abhī baaqī hai

shab jo ḳhvāb dekhā thā ek dasht-e-ḳhvāhish kā
apnā jī kaḌā kar ke aaj us se kah Daalo

ḳhvāb le ke aayā huuñ maiñ dukān-e-dushman par
is se besh-qīmat ab aur chiiz kyā becho