Tags-Khwab

ḳhvāb to mujh ko mele tak le aa.e the
niiñd ke bāhar to vo hī vīrāna thā

kar bhī luuñ agar ḳhvāb kī ta.abīr koī aur
siine meñ utar jā.egī shamshīr koī aur

raat kā ḳhvāb nahīñ jis kī har ik de ta.abīr
ye vo armān hai puurā jo ba-mushkil hogā

vo mirā hogā ye sochā hī nahīñ
ḳhvāb aisā koī dekhā hī nahīñ

vo zindagī thī aap the yā koī ḳhvāb thā
jo kuchh thā ek lamhe ko bas sāmnā huā

har anjuman meñ dhyān usī anjuman kā hai
jaagā ho jaise ḳhvāb koī dekhtā huā

ham apne ḳhvāb-e-ḳhush-fahmī se uTThe
bahut shādāñ-o-farhāñ

tū terā visāl terī furqat
sab ḳhvāb-o-ḳhayāl ho gayā hai

is ālam-e-hairat-o-ibrat meñ kuchh bhī to sarāb nahīñ hotā
koī niind misāl nahīñ bantī koī lamha ḳhvāb nahīñ hotā

yahāñ manzar se pas-e-manzar tak hairānī hī hairānī hai
kabhī asl kā bhed nahīñ khultā kabhī sachchā ḳhvāb nahīñ hotā

palkoñ pe jo āñkhoñ kī nagīne se jaḌe haiñ
kuchh ḳhvāb hai be-jān jo raste meñ paḌe haiñ

ḳhvāb girvī rakh diye āñkhoñ kā saudā kar diyā
qarz-e-dil kyā qarz-e-jāñ bhī aaj chuktā kar diyā

maiñ apnī añgusht kāTtā thā ki biich meñ niiñd aa na jaa.e
agarche sab ḳhvāb kā safar thā magar haqīqat meñ aa basā huuñ

sukūn-e-qalb mayassar ho ḳhvāb puure hoñ
kabhī to aa.e dil-e-be-qarār kā mausam

ik ruuh bulātī hai anāsir ke qafas se
par hosh kisī ḳhvāb kī mahfil meñ chhupā hai

mushkil meñ rahā vo bhī ki tadbīr na thā maiñ
maiñ ḳhvāb to thā us kā pe ta.abīr na thā maiñ

mauhūm-o-muḳhtasar sahī pesh-e-nazar to hai
dekhā kisī ne ḳhvāb ye bār-e-digar kahīñ

adā hai ḳhvāb hai taskīn hai tamāshā hai
hamārī aañkh meñ ik shaḳhs be-tahāshā hai

hastī ke bhayānak nazzāre saath apne chale haiñ duniyā se
ye ḳhvāb-e-pareshāñ aur ham ko tā-sub.h-e-qayāmat sonā hai

ḳhvāb jhaḌ jaate haiñ pattoñ kī tarah
rut badaltī hai to dil dukhtā hai