Tags-Khwab

vahāñ ham ārzū-e-ḳhvāb-e-aish kyā karte
jahāñ qayām ba-miqdār-e-ḳhvāb ho na sakā

bujhe hue dar-o-dīvār ko bhī raunaq de
ye ḳhvāb ban ke mirī aañkh se guzarnā kyā

baaz aa.e zindagī ke ḳhvāb-e-rañgā-rañg se
dast o pā gum kar diye andesha-e-tābīr ne

aag havā aur miTTī paanī mil kar kaise rahte haiñ
dekh ke ḳhud ko hairāñ huuñ maiñ jaise ḳhvāb kahānī hai

ye ḳhvāb aur bhī dekheñge raat baaqī hai
abhī to ai dil-e-zinda hayāt baaqī hai

na koī takiya-e-ġham hai na koī chādar-e-ḳhvāb
hameñ ye kaun sā bistar milā hai sone ko

ḳhāmushī reñgtī hai rāhoñ par
ek afsūñ-ba-dosh ḳhvāb liye

ai ḳhvāb-e-pazīrā.ī tū kyuuñ mirī āñkhoñ meñ
andesha-e-duniyā kī ta.abīr uThā laayā

vahī ḳhasta-hāl ḳharāb hai vahī ḳhvāb kushta-e-ḳhvāb hai
vahī zindagī ko javāb hai na salām hai na payām hai

vahī ḳhvāb-o-ḳhur kī talāsh hai vahī jān-o-dil meñ ḳharāsh hai
vahī rañj-e-ġhair-e-ma.āsh hai mujhe zindagī bhī harām hai

kartā bad-haz hai faqat tāla-e-bedār ko ḳhvāb
varna har jāgne vaale ko milā ḳhvāb se haz

hadaf ban pā.eñgī āñkheñ na mere dushmanoñ kī
muqābil hai ḳhadañg-e-ḳhvāb ke ab siina merā

na aanā thā gar aa.e kyuuñ ḳhvāb meñ
magar sote fitne jagāte haiñ aap

rishta kaise TūTtā hai ḳhvāb se ta.abīr kā
aao dikhlā.ūñ tumheñ ye khel bhī taqdīr kā

mirī zamīn-e-chashm-e-nam meñ ḳhvāb bo diye ga.e
mujhe ḳhamīr-e-shauq lā-zavāl de diyā gayā

zinda rahne ke liye ḳhvāb zarūrī hai bahut
so hameñ ḳhvāb nayā koī dikhāte jaate

hameñ to kal kisī agle nagar pahuñchnā hai
matā-e-ḳhvāb tujhe ab kidhar pahuñchnā hai

ajiib ḳhvāb the shīshe kī kirchiyoñ kī tarah
jab un ko dekhā to āñkhoñ se ḳhuuñ nikalne lagā

nit-na.e ḳhvāb dikhātā hai ujāloñ ke liye
vo ki hai dushman-e-jāñ dushman-e-īmāñ apnā

kyā milā hai ma.āl-e-bedārī
merī āñkheñ haiñ aur ḳhvāb tirā