Tags-Khwab

maiñ to abhī bistar se uThā huuñ aur mirī āñkhoñ meñ ab tak
ḳhvāb kā saarā manzar hai

ḳhvāb qissa chāhateñ duniyā siyānī le ga.ī
aur jo baaqī thā terī lan-tarānī le ga.ī

kis ne ḳhvāb-e-insāñ ke nuqra.ī safīne ko
saḳht-tar talātum kī zad meñ bhī sambhālā hai

jis aañkh ne dekhe the kabhī ḳhvāb tumhāre
us aañkh se hotī huī barsāt to dekho

āñkhoñ ne banā.ī thī koī ḳhvāb kī tasvīr
tum bhuul ga.e ho to kise dhyān rahegā

maazī ke ḳharāboñ meñ bhī kahīñ lau detā rahā sūraj apnā
maazī ke ḳharāboñ meñ bhī ham ik ḳhvāb-e-jahān-fardā the

bahut sī āñkheñ mirī raah dekhtī hoñgī
maiñ ek ḳhvāb huuñ ta.abīr ho rahā huuñ abhī

maiñ so rahā thā aur mirī ḳhvāb-gāh meñ
ik azhdahā charāġh kī lau ko nigal gayā

vo niiñd ke safar meñ to maḳhmūr thā bahut
āñkheñ khulīñ to ḳhvāb ke manzar se Dar gayā

qasam na khā.ūñgā tīsoñ kalām kī ai 'bahr'
kisī kā ḳhvāb meñ bosa to lā-kalām liyā

lab-e-īsā kī jumbish kartī hai gahvāra-jumbānī
qayāmat kushta-e-la.al-e-butāñ kā ḳhvāb-e-sañgīñ hai

dil pareshāñ ho magar aañkh meñ hairānī na ho
ḳhvāb dekho ki haqīqat se pashemānī na ho

jaanā ye ham ne vafāt ke ba.ad
dekhā jo jahāñ meñ ḳhvāb dekhā

ajiib ḳhvāb thā us ke badan meñ kaa.ī thī
vo ik parī jo mujhe sabz karne aa.ī thī

mahkī rāteñ dost havā.eñ pichhlī shab kā chāñd
rah ga.e sab ḳhush-ḳhvāb nazāre dariyā ke us paar

zindagī kyā hai ka.ī baar ye sochā maiñ ne
ḳhvāb se pahle kisī ḳhvāb kā manzar hogā

ye kaise ḳhvāb kī ḳhvāhish meñ ghar se niklā huuñ
ki din meñ chalte hue niiñd aa rahī hai mujhe

ḳhvāb ḳhud haqīqat haiñ aañkh khol kar dekho
kis ne kah diyā tum se ḳhvāb sach nahīñ hote

zard phūloñ meñ basā ḳhvāb meñ rahne vaalā
dhund meñ uljhā rahā niiñd meñ chalne vaalā

hai qafas bhī tilism-ḳhāna-e-ḳhvāb
aa ga.e ek aur shahr meñ ham