Tags-Khwab

aañkh khulī to mujh ko ye idrāk huā
ḳhvāb-nagar kā har manzar saffāk huā

tamām shab mirī āñkhoñ kā ḳhvāb rahte ho
tamām raat kisī ko jagānā Thiik hai kyā

koī is ḳhvāb kī ta.abīr badal de yā-rab
ghar meñ bahtā huā ik ḳhuun kā dariyā dekhā

kahīñ ilāhī shab-e-judā.ī tamām hone ko aa ga.ī hai
numūd-e-sub.h-e-jazā ho shāyad ki maiñ ne dekhā hai ḳhvāb-e-āriz

ta.abīr jis kī zeb-e-nashāt-e-davām ho
aisā to koī ḳhvāb-e-pareshāñ nahīñ huā

uTh ai barbād-e-tamannā kī na.ī ḳhvāb--kanīz
haram-e-chashm meñ phir raqs ko laa.ī ga.ī hai

diloñ ke dard jagā ḳhvāhishoñ ke ḳhvāb sajā
balā-kashān-e-nazar ke liye sarāb sajā

kahūñ kyā haal aglī ishratoñ kā
vo thā ik ḳhvāb jo bhūlā huā hai

bhuul jaatā huuñ magar sach to yahī hai barsoñ
tum se vābasta rahe ḳhvāb suhāne kitne

dayār-e-ḳhvāb meñ kuchh tā.irān-e-ḳhush-āvāz
tumhāre aane kī ummīd meñ chahakte rahe

jāgtī aañkh se jo ḳhvāb thā dekhā 'anvar'
us kī ta.abīr mujhe dil ke jalāne se milī

ḳhvāb ta.abīr ke asiir na the
rahguzar the ye rāhgīr na the

palkoñ pe le ke bojh kahāñ tak phirā karūñ
a ḳhvāb-e-rā.egāñ maiñ batā terā kyā karūñ

maiñ bhī kuchh ḳhvāb sar-e-shahr-e-tamnnā le kar
sar meñ irfān-e-ġham-e-zāt kā saudā le kar

aa.egī kaise niiñd dikhā vo hunar use
phir is ke ba.ad ḳhvāb ko chhū kar use dikhā

safar kaTe ki nahīñ naqsh-e-pā rahe lekin
ḳhayāl-o-ḳhvāb rahe rañgat-e-hinā.ī rahī

ye kaisā ḳhvāb thā 'zīshān' zindagī apnī
ye kaisī dhun mire chāroñ taraf samā.ī rahī

majlis ki ḳhvāb-gāh jahāñ bhī nazar milī
un ko yahī thā ḳhauf koī dekhtā na ho