Tags-Khwab

haath meñ chāñd ko pighlā dekhūñ
ḳhvāb dekhūñ ki ḳharāba dekhūñ

mire darīcha-e-dil meñ Thahar na jaa.e kahīñ
vo ek ḳhvāb ki jis ko sitāra karnā hai

āñkhoñ meñ ḳhvāb chubhte raheñge tamām umr
ye dard-e-lā-davā thā masīhā bhī the hamīñ

ḳhvāb kaise utartā hai ehsās meñ
tere shāne pe rakh ke ye sar dekhte

kabhī vo mastī meñ rañg laa.e kabhī kiyā shaad muskurā.e
ajab tarah ke maze uThā.e visāl kī shab meñ ḳhvāb kaisā

ḳhvāb ta.abīr meñ Dhalte haiñ yahāñ se aage
aa nikal jaa.eñ shab-e-vahm-o-gumāñ se aage

ġhurūb hote hue do sitāre āñkhoñ meñ
shikast-e-ḳhvāb ke haiñ isti.āre āñkhoñ meñ

ham āḳhir-e-shab-e-ummīd so bhī jaa.eñ magar
vo ḳhvāb-e-gum-shudgāñ kaun utāre āñkhoñ meñ

kitne kan.ān hue ḳhvāb-e-zuleḳhā meñ asiir
kitne yāqūb rahe hijr ke sadmāt meñ gum

zindagī ek safar ḳhauf kī zanjīr ke saath
maut ik ḳhvāb-e-girāñ hashr kī ta.abīr ke saath

ḳhvāb bhī ḳhvāb ho ga.e 'ādil'
shakl-o-sūrat dikhā ke kāġhaz par

ik ḳhvāb sahārā thā
vo TuuT gayā hogā

shab ḳhvāb meñ aayā vo
kyā kyā na huā hogā

ik ḳhvāb-e-tamannā ne
barbād kiyā hogā

nahīñ hai ḳhvāb sī tasvīr jis kī
to phir us ḳhvāb kī ta.abīr kyā hai

bin dekhe us ke jaave rañj o azaab kyuuñ kar
vo ḳhvāb meñ to aave par aave ḳhvāb kyuuñ kar

kis ajab sā.at-e-nāyāb meñ aayā huā huuñ
tujh se milne maiñ tire ḳhvāb meñ aayā huā huuñ

vo raushnī kā ḳhvāb thā magar vahī sarāb thā
uruuj meñ chhupī huī thī ibtidā zavāl kī

mere ajdād ke to ḳhvāb yahāñ dafn nahīñ
ye havelī ye pur-asrār dhuāñ hai kaisā

jo mere ḳhvāb meñ rahī paikar-e-rañg-e-nūr thī
ye to lahūluhān hai ye to mirī sahar nahīñ