Tags-Khwab

aisā hai ki sab ḳhvāb musalsal nahīñ hote
jo aaj to hote haiñ magar kal nahīñ hote

us kī āñkhoñ meñ chamak ḳhvāb kī ye kaisī hai
raat bhar charḳh ne bedār use dekhā thā

khā ga.iiñ dariyā kī maujeñ ḳhvāb-āvar goliyāñ
bādbānī ke liye pāgal havā baaqī rahe

maiñ apnī niiñd kisī ghar meñ kaise bhuul aatā
vo mere ḳhvāb ke sāñche meñ Dhal gayā hotā

ruuh muztar dil pareshāñ chashm hai mahrūm-e-ḳhvāb
maiñ bahut masrūr huuñ ai ishq tū hai kāmyāb

chale to aa.e haiñ ham ḳhvāb se haqīqat tak
safar tavīl thā ab tak takān baaqī hai

maanā ki tire lutf-o-karam ḳhvāb haiñ lekin
har shaḳhs ko ye ḳhvāb nazar aa nahīñ sakte

merī āñkhoñ meñ kisī ḳhvāb ne dam toḌ diyā
merī palkoñ se ulajhtī huī ta.abīr ko dekh

mire vatan mire sāmān meñ to kuchh bhī nahīñ
bas ek ḳhvāb hai aur ḳhvāb kī fasīleñ haiñ

ishq meñ ḳhvāb kā ḳhayāl kise
na lagī aañkh jab se aañkh lagī

ba-qadr-e-ḳhvāb-e-talab lahū hai na zindagī hai
adā karoge kahāñ se itnā udhār kar ke

mire ehsās ke is ḳhvāb kā anjām kyā hogā
ye mere andarūn-e-zāt ke tārāj-gar

maiñ mahv-e-ḳhvāb thā ki mire man kī ek mauj
uTThī to us ke band-e-qabā tak pahuñch ga.ī

ḳhvāb-o-ḳhayāl-e-gul se kidhar jaa.e aadmī
ik gulshan-e-havā hai jidhar jaa.e aadmī

tamām raat mirī niiñd mujh ko Dastī rahī
tamām ḳhvāb mirī dekh-bhāl karte rahe

ik ḳhvāb kī ta.abīr haqīqat hī na ho
andāz-e-taġhāful meñ mohabbat hī na ho

yuuñ to har ek shabistāñ hai munavvar tujh se
kabhī merā bhī koī ḳhvāb sajāyā hotā

vo ek lamha vo ek saa.at huā thā jab un se ahd-e-ulfat
use bhī kyā ai ḳhudā-e-rahmat sharīk-e-ḳhvāb-o-ḳhayāl kar leñ

dil ḳhvāb kī ġhaflat se mabādā kahīñ chauñke
ye fitna-e-ḳhvābīda hī bedār na hove

kartā rahe junūñ ye ta.āqub sarāb kā
pyāse ko ḳhvāb meñ abhī dariyā dikhā.ī de