Tags-Khwab

āshiqī meñ 'mīr' jaise ḳhvāb mat dekhā karo
bāvle ho jāoge mahtāb mat dekhā karo

Darā rahe haiñ ye manzar bhī ab to ghar ke mujhe
dikhā.ī ḳhvāb diye raat bhar khañDar ke mujhe

raat bhīgī hai 'shafaq' aao ab
ḳhvāb-e-bedār kī bāteñ kareñ kyā

kyuuñ javānī kī mujhe yaad aa.ī
maiñ ne ik ḳhvāb sā dekhā kyā thā

mere bhī ka.ī ḳhvāb the mere bhī ka.ī azm
hālāt se inkār kī sūrat nahīñ koī

tū sub.h-e-bahārāñ kā hasīñ ḳhvāb hai phir bhī
āhista zarā os kī būñdoñ pe chalā kar

ḳhvāb meñ yā ḳhayāl meñ mujhe mil
tū kabhī ḳhadd-o-ḳhāl meñ mujhe mil

jo ḳhvāb dekhe haiñ dil un se kyuuñ ulajhtā hai
maiñ ab ye falsafa shāyad samajh na pā.ūñgī

tabīb kahte haiñ juz vahm-e-ḳhvāb kuchh bhī nahīñ
to kyā jo ham ne sahe vo azaab kuchh bhī nahīñ

ḳhushk āñkhoñ ko diid se ḳhīra kar
ḳhvāb ubhar shamshīr kī sūrat aa

aur ye merā ḳhvāb nahīñ
ki sūraj jab

maiñ ek umr se buntī huuñ ḳhvāb chāhat ke
hisār-e-dīda-e-nam-nāk meñ ḳhasāra huuñ

muskurā.egī jab āñkhoñ meñ sitāroñ kī laḌī
aa.ina ban ke hasīñ ḳhvāb nazar aa.egā

maiñ ki ab terī hī dīvār kā ik saayā huuñ
kitne be-ḳhvāb darīchoñ se guzar aayā huuñ

shaam hote hī vo chaukhaT pe jalā kar sham.eñ
apnī palkoñ pe ka.ī ḳhvāb sulātī hogī

jo farā.ez haiñ bhuul jaa.eñ 'karan'
is qadar ḳhud ko mahv-e-ḳhvāb na kar

añdherī shab kā ye ḳhvāb-manzar mujhe ujāloñ se bhar rahā hai
to raat itnī tavīl ho jaa.e tā-qayāmat sahar na aa.e

zarā sī raat aur itnā savāb kaafī hai
mirī nazar ko faqat terā ḳhvāb kaafī hai

mirī chashm-e-nam kisī ratjage meñ ulajh ga.ī
mirī niiñd oḌh le raat bhar mujhe ḳhvāb de

tum kyā jaano zaḳhmī āñkheñ ḳhvāb bikhar jaane kā dukh
tum kyā jaano hijr ke aañsū dard uThānā kyā hotā hai