Tags-Khwab

ḳhvāb TuuTe hue rūThe hue lamhe vo 'qamar'
bojh kitne hī uThāne ke liye zinda huuñ

jis kī ta.abīr hai ik ḳhvāb meñ chalte rahnā
kyuuñ na us ḳhvāb se bedār abhī ho jaa.eñ

sañg ko takiya banā ḳhvāb ko chādar kar ke
jis jagah thaktā huuñ paḌ rahtā huuñ bistar kar ke

jaane kyā dekhā thā maiñ ne ḳhvāb meñ
phañs gayā phir jism ke girdāb meñ

merā va.ada hai ki saarī zindagī
tujh se maiñ miltā rahūñgā ḳhvāb meñ

siskiyāñ bhar ke 'sharar' kaun vahāñ rotā thā
ḳhema-e-ḳhvāb sar-e-shām jahāñ par TuuTā

maiñ ik hasīñ ḳhvāb dekhtā huuñ
maiñ dekhtā huuñ

ibtidā kitnī mohabbat kī hasīñ hotī hai
zindagī ḳhvāb pe mā.il-ba-yaqīñ hotī hai

na chhat pe chāñd Tikegā na raat Thahregī
har ek ḳhvāb ko āñkhoñ meñ mat sajāyā kar

apne markaz se agar duur nikal jāoge
ḳhvāb ho jāoge afsānoñ meñ Dhal jāoge

ḳhvāb-gāhoñ se nikalte hue Darte kyuuñ ho
dhuup itnī to nahīñ hai ki pighal jāoge

kaun us ḳhvāb kī ta.abīr pe kartā hai yaqīñ
ḳhvāb jo niiñd se laḌtā huā mar jaatā hai

maiñ jāgte meñ kahīñ ban rahā huuñ az-sar-e-nau
vo apne ḳhvāb meñ tashkīl kar rahā hai mujhe

ḳhvāb meñ dil-navāziyāñ 'jāved'
aur haqīqat hai be-ruḳhī us kī

zindagī ḳhvāb hai aur ḳhvāb bhī aisā ki miyāñ
sochte rahiye ki is ḳhvāb kī ta.abīr hai kyā

ḳhvāb-zādoñ kā dukh zamīnī hai
ye haqīqat baḌī kamīnī hai

tujhe hī sochte hue phir aaj so gayā huuñ maiñ
guzar tirā ho ḳhvāb se to niiñd se jagā mujhe

mat kaho mujh siiñ qissa-e-farhād
ḳhvāb-e-shīrīñ meñ aaj sotā huuñ

usī ke ḳhvāb the saare usī ko sauñp diye
so vo bhī jiit gayā aur maiñ bhī haarā nahīñ

kab sub.h ke naale kaam aa.e kyā girya-e-nīm-shabī se milā
is qarya-e-ḳhvāb-faroshāñ meñ tum kis ke liye bedār hue