Tags-Khwab

asl meñ aksar hī mar jaate haiñ ham
ḳhvāb meñ jī bhar ke jumbish karte haiñ

ḳhvāb meñ gum huuñ ki bāhar kī fazā achchhī nahīñ
aañkh khulte hī kahīñ zanjīr ho jaatā huuñ maiñ

is añdhere meñ charāġh-e-ḳhvāb kī ḳhvāhish nahīñ
ye bhī kyā kam hai ki thoḌī der so jaatā huuñ maiñ

ik purānī aarzū Thahrī ujāloñ kī talab
ik purānā ḳhvāb Thahrā hai sahar kā jāgnā

jis kī nazroñ meñ thā ik ālamī tahzīb kā ḳhvāb
jis kā har saañs na.e ahd kā me.amār rahā

ik ḳhvāb niiñd kā thā sabab, jo nahīñ rahā
us kā qalaq hai aisā ki maiñ so nahīñ rahā

ek ta.abīr kī sūrat nazar aa.ī hai idhar
so uThā laayā huuñ sab ḳhvāb purāne vaale

kyā ta.ajjub thā ki is saudā-garī ke daur meñ
ḳhvāb bhī ta.abīr ho jaane kī qīmat māñgtā

vo ḳhvāb the hī chambeliyoñ se so sab ne hākim kī kar lī bai.at
phir ik chambelī kī oT meñ se jo saañp nikle to log samjhe

mirī niind mūnis-e-ḳhvāb kar mirī rat-jagoñ kā hisāb kar
mire naam fasl-e-gulāb kar kabhī aisā mujh ko bhī pyaar de

bistar-e-marg par mujhe jiine ke ḳhvāb de ga.e
jā.ūñ unhī ke sāmne un kā kalām Daal duuñ

usī kī chaap hai ukhḌe hue khḌanje par
vo ḳhisht o ḳhvāb ko bairūn-e-azmagīñ laayā

ashk dāman meñ bhare ḳhvāb kamar par rakkhā
phir qadam ham ne tirī rāhguzar par rakkhā

chalte chalte jo thake paañv to ham baiTh ga.e
niiñd gaThrī pe dharī ḳhvāb shajar par rakkhā

ye sañg-e-ḳhvāb 'shafaq' aañkh ke pasīne par
kisī bhī vaqt phisal jā.egā ḳhabar nahīñ thī

shab-e-visāl kahāñ ḳhvāb-e-nāz kā mauqa.a
tumhārī niiñd ko aate hayā nahīñ aatī

ham to akele roz ulajhte haiñ ḳhvāb se
kuchh bojh zindagī kā sambhālā usī kā hai

ḳhvāb meñ jaise jaan chhuḌā kar bhaag na sakne vaale
bhāgeñ aur vahīñ rah jaa.eñ ham bhī pāgal tum bhī

phir yuuñ huā ki shauq se kholī na maiñ ne aañkh
ik ḳhvāb aa gayā thā mirī ḳhvāb-gāh meñ

ḳhayāl-o-ḳhvāb ke mausam badalne vaale haiñ
hujūm vahm-o-tasavvur meñ hai gumān-zada