Tags-Khwab

nigāh-e-'yās' hī goyā dobāra zindagī paa.ī
jo chauñkā ḳhvāb-e-ġhaflat ke maze se āshnā ho kar

sarāb-e-ḳhvāb dekhūñ yā uḌā.ūñ ḳhaak apnī
ye sahrā ik makāñ aur ik galī par mushtamil hai

rāt-bhar niiñd ke sahrā meñ bhaTaktā huuñ magar
sub.h tak ḳhvāb kī takmīl nahīñ ho paatī

vo mire ḳhvāb-e-pairahan chhū kar
uTh gayā aañkh kī chubhan chhū kar

ḳhvāb āñkhoñ meñ rañg tair ga.e
badliyāñ aa ga.iiñ kiran chhū kar

maiñ ne dekhā raat merī god meñ mahtāb thā
aap hī ta.abīr us kī deñ ye kaisā ḳhvāb thā

tum ne jo toḌ diye ḳhvāb ham un ke badle
koī qīmat kabhī lete to ḳhudā.ī lete

the haqīqat nazar na aa.e ham
jab hue ḳhvāb jagmagā.e ham

hamārī aañkh se nīndeñ uḌāne lagtā hai
jise bhī ḳhvāb samajh kar pukārte haiñ ham

tirā vo rātoñ ko uTh kar sisak sisak ronā
lahū meñ niiñd kī Tīseñ palak pe ijz ke ḳhvāb

is qadar ḳhauf meñ huuñ maiñ ki na niiñd aave hai
kis qadar ḳhvāb meñ haiñ ahl-e-vatan kyā kahnā

apnī ḳhvāhish apnī soch ke biij liye
ik an-dekhī ḳhvāb-zamīñ ko DhūñDhtā huuñ

ḳhvāb āñkhoñ meñ basā.e to huī ye ḳhvāhish
koī ham se bhī ye pūchhe ki ġham-e-dil kyā hai

kahānī likhte hue dāstāñ sunāte hue
vo so gayā hai mujhe ḳhvāb se jagāte hue

har mauj meñ giryāñ rahtā hai girdāb meñ raqsāñ rahtā hai
betāb bhī hai be-ḳhvāb bhī hai ye kaisā zinda paanī hai

shab-e-vasl dekh ke ḳhvāb meñ maiñ paḌā thā saḳht azaab meñ
the hazār soch javāb meñ ajab us kā mujh se savāl thā

mauqe kī ab to ye hai jo vaqt-e-shab hai ai jaañ
ham baiThe paañv dābeñ aur aap ḳhvāb kiije

dayār-e-ḳhvāb meñ ik shaḳhs ham-qadam thā magar
paḌā jo vaqt to rasta badal gayā vo bhī

ho liye duniyā ke puure kārobār
aur ik ḳhvāb-e-girāñ baaqī rahā

gayā hai jab se dikhā jalva vo parī-ruḳhsār
na ḳhvāb dīda-e-giryāñ meñ hai na dil ko qarār